30-mart, dushanba kuni, soat 13:30 da AOKA huzuridagi shtabda ichki ishlar vaziri matbuot kotibi Shohrux G‘iyosov ishtirokida brifing o‘tkazildi.
Unda Yunusobod tumanida to‘y marosimini o‘tkazgan otaxonga nisbatan qanday chora ko‘rilgani, zarur holatlarda qarindoshlardan tashqari hech kimni taklif etmasdan “imi-jimida” kichik yig‘inlarni o‘tkazib yuborish mumkinmi, deya savol berildi.
IIV matbuot kotibining bildirishicha, haqiqatan ham, 28-mart kuni Toshkent shahri Yunusobod tumanida yashovchi fuqaro bir kun oldin profilaktika inspektori va mahalla raisi tomonidan bunday tadbir o‘tkazish karantin qoidalarini qo‘pol ravishda buzish ekanligi haqida rasmiy ravishda tilxat olib ogohlantirilganiga qaramay, qizini uzatish maqsadida “kuyov-navkar” marosimini o‘tkazgan, tadbirga o‘zining qarindoshlari, kuyov va uning do‘stlarini taklif etgan.
Hozirda ushbu fuqaroga nisbatan Jinoyat kodeksining 257-1-moddasi, ya’ni epidemiyaga qarshi kurash qoidalarini buzish bilan jinoyat ishi qo‘zg‘atilgan.
“‘Imi-jimida’ to‘y marosimini yoki boshqa yig‘inlarni o‘tkazish taqiqlangan. Agar ichki ishlar organlari to‘y yoki boshqa marosimlarni o‘tkazayotganingizni aniqlasalar, siz jinoiy javobgarlikka tortilasiz. Albatta, dafn marosimlari bundan mustasno”, — deya javob bergan Shohrux G‘iyosov va fuqarolardan karantin qoidalariga qat’iy rioya qilishlarini so‘ragan.
Avvalroq Toshkentda karantinga qaramay kuyov-navkar o‘tkazgan kelinning otasiga jinoiy ish qo‘zg‘atilgani xabar berilgan edi.
