Nyu-Yorkda prodyuser Xarvi Vaynshteyn jinsiy zo‘ravonlikda ayblanib, 23 yilga hukm qilindi. Uni ayblaganlar orasida Anjelina Joli, Salma Hayek ham bor

Nyu-York shtati sudi prodyuser Xarvi Vaynshteynni zo‘rlash va jinsiy zo‘ravonlikda aybdor deb topib, 23 yilga ozodlikdan mahrum qildi. Bu haqda “Kommersant” xabar bermoqda.

Jarayon 6-yanvar kuni boshlangan. 24-fevral kuni sud hay’ati Vaynshteynni sudda ko‘rilayotgan 5 ta ishning 2 tasida aybdor deb topdi. Sudlanuvchi esa aybini tan olmagan. Uning advokatining aytishicha, ayollarning o‘zi karyerada ko‘tarilish umidida u bilan yaqin aloqada bo‘lishga ixtiyoriy ravishda rozi bo‘lgan.

Xabarda aytilishicha, Vaynshteynga qarshi birinchi ommaviy ayblovlar 2017-yil oktabrida The New York Times va New Yorker gazetalarida Miramax va The Weinstein Company kino kompaniyalari xodimlariga, shuningdek, u suratga olgan filmlarda rol o‘ynagan aktrisalarga nisbatan uzoq muddatli jinsiy zo‘ravonlik qilgani haqidagi maqolalar e’lon qilganida paydo bo‘lgan.

Shundan buyon Vaynshteynni 80 dan ortiq ayollar jinsiy zo‘ravonlikda ayblagan. Ular orasida Anjelina Joli, Gvinet Peltrou, Uma Turman, Salma Hayek ham bor. U ishdan olingan, kompaniyasi esa bankrot deb e’lon qilingan.

Vaynshteynga qarshi rasmiy ayblov 2018-yil may oyida e’lon qilingan bo‘lib, u Nyu-York politsiyasiga taslim bo‘lgan. Nyu-Yorkda Vaynshteynga qarshi sud boshlanganidan keyin Los-Anjeles prokuraturasi ham yangi ayblovlarni ilgari surgan. Endi u Los-Anjeles sudida ham javob berishi kerak. Shuningdek, Londonda ham unga qarshi jinoiy tergov olib borilmoqda.