“Daryo” qoshida yosh jurnalistlar maktabi ish boshlaydi. Ushbu maktabning birinchi bitiruvchilari qatorida bo‘lishni istaysizmi? “Daryo” jamoasiga qo‘shilishni-chi? Unda “Daryo” maktabiga hujjat topshiring.
“Daryo” maktabi rahbari – taniqli bloger, “Daryo” muharriri Eldar Asanov. Shuningdek, “Daryo”ning boshqa tajribali xodimlari hamda taklif qilingan ma’ruzachilar – mashhur bloger va jurnalistlar dars o‘tadi.
Maktabga kimlar qabul qilinadi?
- bakalavriatning oxirgi kurslarida o‘qiydigan talabalar;
- magistrantlar;
- o‘qishni bitirgan, o‘z yo‘lini qidirayotgan yosh mutaxassislar.
“Daryo” maktabida o‘qish uchun jurnalist bo‘lish shartmi?
Yo‘q!
Asosiy talab – yozishga, professional jurnalistik faoliyat olib borishga xohish, ma’lum mavzuga, yo‘nalishga qiziqish. Qolganini o‘zimiz o‘rgatamiz.
Siyosatshunoslik, iqtisodiyot, huquqshunoslik, sotsiologiya va boshqa sohalar bo‘yicha yosh mutaxassislarni bajonudil o‘qishga qabul qilamiz.
“Daryo” maktabi tinglovchisining taxminiy portreti
- 19 – 27 yosh orasidagi yigit yoki qiz;
- qaysi sohada o‘qishi, qaysi yo‘nalishni bitirganidan qat’i nazar, professional jurnalist bo‘lish xohishi;
- muayyan mavzuga qiziqish: iqtisodiyot, tashqi siyosat, sport, yurisprudensiya, madaniyat va hokazo.
“Daryo” maktabi tinglovchisiga aylanish uchun nima qilish kerak?
Hujjat topshirish!
Niyatingiz qat’iy bo‘lsa, “Daryo”ga quyidagi hujjatlarni yuboring:
- CV yoki obyektivka;
- o‘zingiz yozgan 2–6 bet matn (chop etilgan yoki chop etilmagan);
- motivatsion xat; unda nega “Daryo” maktabiga qiziqayotganingiz, “Daryo”ga nima bera olishingiz, kelajakdagi rejalaringiz, shuningdek, qiziqqan yo‘nalishingiz (siyosat, iqtisodiyot va h.k.) va janringiz (xabar, surishtiruv, analitika, intervyu, storitelling va h.k.) aniq ko‘rsatilishi lozim.
Barcha hujjatlar elektron fayl holida bitta xatga ilova tarzida info@simple.uz manziliga yuborilishi lozim. Hujjatlar 20-fevralgacha qabul qilinadi. Tanlovdan o‘tganlar elektron manziliga 29-fevralga qadar tabrik xati va keyingi harakatlar instruksiyasi yuboriladi.
“Daryo” maktabida o‘qish bepul. Eng iqtidorli tinglovchilar “Daryo”da ishga joylashish imkoniyatiga ega bo‘ladi.
Izoh (0)