Axborot va ommaviy kommunikatsiyalar agentligida jurnalistika sohasiga oid 10 jildlik qo‘llanmaning taqdimot marosimi bo‘lib o‘tdi. Tadbirda agentlik rahbariyati, senatorlar, professor-o‘qituvchilar, talabalar hamda ommaviy axborot vositalari vakillari ishtirok etdi. Bu haqda agentlik axborot xizmati xabar bergan.
“Mazkur qo‘llanmani tayyorlash ishlari besh oy oldin boshlangan edi. O‘sha paytda rahbarimiz Komil Allamjonov hamda direktor o‘rinbosari Saida Mirziyoyeva ushbu masalaga katta e’tibor qaratib, qo‘llab-quvvatlagan. Deyarli har hafta nashriyot rahbarlari, qo‘llanma uchun mas’ul shaxslarga uni sifatli qilib tayyorlash yuzasidan topshiriqlar berilgan edi. Mana, qisqa vaqt ichida katta mehnat evaziga 10 jildlik qo‘llanma tayyor bo‘ldi”, — deya ta’kidlagan marosimda AOKA direktorining birinchi o‘rinbosari Dilshod Saidjanov.
Qo‘llanmaning har bir jildi, ulardagi boblar, mavzularni aniqlash maqsadida yuqoridagi oliy ta’lim muassasalari vakillari bilan bir qatorda Jurnalistlar malakasini oshirishi markazi, O‘zbekiston milliy teleradiokompaniyasi, O‘zbekiston milliy axborot agentligi, O‘zbekiston elektron ommaviy axborot vositalari milliy assotsiatsiyasi, “Dunyo” axborot agentligi vakillari, taniqli ijodkorlardan iborat tarkibda ishchi guruh tuzildi. Bir necha bor maslahat yig‘ilishlari o‘tkazildi. Har bir jild bo‘yicha mas’ul muharrirlar tanlab olindi va ularning tavsiyalari asosida mualliflar tarkibi shakllantirildi. Qo‘llanma oliy ta’lim muassasalarida ta’lim jarayonida foydalanish bilan bir qatorda, “Jurnalistning shaxsiy kutubxonasi” sifatida har bir tahririyatda, jurnalistlarning shaxsiy kitob javonlaridan o‘rin olishga arziydigan adabiyotlar sifatida tayyorlandi.
Qo‘llanmaning har bir jildi “Jurnalistika nazariyasi, tarixi va taraqqiyoti”, “Jurnalistika huquqi va etikasi”, “Medialingvistika va tahrir”, “Media-marketing va menejment”, “Bosma ommaviy axborot vositalarida janrlar va mahorat masalalari”, “Audiovizual jurnalistika”, “Onlayn jurnalistika va mediada yangi trendlar”, “Zamonaviy media muhitda PR-xizmatlar”, “Ixtisoslashgan jurnalistika”, “Jurnalistika sotsiologiyasi va psixologiyasi” 1000 nusxada nashrdan chiqarildi.
Tadbirda O‘zbekiston Jurnalistlari ijodiy uyushmasi vakillari, O‘zbekiston jurnalistika va ommaviy kommunikatsiyalar universiteti hamda O‘zbekiston davlat jahon tillari universiteti o‘qituvchilari so‘zga chiqib, mazkur qo‘llanmaning chop etilishi soha rivoji uchun yangi qadam bo‘lganini qayd etdi.
“Ushbu kitobning chop etilishi xuddi Alisher Navoiyning “Farhod va Shirin” dostonida tog‘ni teshib suv ochgandek xayrli ish bo‘ldi. Agentlik, nashriyot va qo‘llanmalar mualliflari ilm bulog‘iga yo‘l ochdi, desam mubolag‘a bo‘lmaydi. Bu ish nihoyatda ulkan ilmiy izlanishlar natijasidir. Shuning uchun O‘zbekistonda ham “jurnalistika professori” degan ilmiy unvon ta’sis etilsa, maqsadga muvofiq bo‘lar edi”, — dedi “Jahon adabiyoti” jurnali bosh muharriri Ahmadjon Meliboyev.
Izoh (0)