Qadrli, 17 yoshli Kobi!Ertadan sening orzularing amalga oshishni boshlaydi. Axir sen endi “Leykers” uchun o‘ynaysan. Sen oila va do‘stlaring kelajagiga qanday sarmoya kiritishni tushunib olishing kerak. To‘g‘ri, bu gaplar juda oson, sodda eshitilishi, shu bilan birga unchalik zukkolikni talab qilmasligi ham rost gap. Ammo bunga biroz vaqt ajratganing ma’qul.
Shunchaki berish emas, balki sarmoya kiritish lozim!
Kelaqol, senga tushuntirishga harakat qilaman.
Ba’zan atrofingizdagilarga kerak bo‘lgan narsani berish — to‘g‘ri qadam. Boisi to yoshlikdan o‘sib-ulg‘ayguningga qadar ular yoningda bo‘ladi. Sen esa ularni yaxshi ko‘rasan. Demak, o‘z muvaffaqiyatlaringni ular bilan bo‘lishish ham kerak. Sen ularga mashina, uy sotib olib berasan, hamma xarajatlarini bo‘yningga olasan, shundaymi? Bularning hammasi nima uchun, albatta, ularning yaxshi yashashi uchun, to‘g‘rimi?
Biroq bir kun kelib hammasini tushunib yetasan: yaqinlaringga qancha g‘amxo‘rlik qilib, ularga katta e’tibor qarataversang, ularni rivojlanishdan, hamma-hammasidan to‘xtatib, cheklab qo‘ygan bo‘lasan.
Barchasini ularning foydasi, manfaati uchun qilgan bo‘lsang-da, baribir qilganlaring ortida o‘z xotirjamliging, xursandchiliging yotganini tushunib yetasan. Bu esa xudbinlikdan o‘zga narsa emas. Lekin o‘sha vaqtda juda ham o‘zingdan mamnun bo‘lasan va o‘zing bilmagan holda yana ularning orzulari, xohishlarini yo‘q qilishda davom etasan. Sen ularga yashash uchun kerak bo‘ladigan moddiy boyliklarni taqdim etding, biroq hayotdagi eng asosiylaridan mahrum qilding: mustaqillik va rivojlanish imkoniyatidan.
Shunday ekan, sen ularga shunchaki sovg‘a qilma, balki ularning kelajagi uchun sarmoya kirit!
Shaxs sifatida rivojlanish va maqsadlarga erishishda kerak bo‘ladigan narsalar uchun o‘z noming va muvaffaqiyatlaringdan foydalan. Ularni o‘qit, ishida yordam ber. Shunda ular o‘z hayotining bir bo‘lagiga bo‘lsa ham xo‘jayin bo‘ladi. Ularni ko‘proq mehnat qilish va sodiq bo‘lishga unda. Hozir turgan joyingga qanday qilib kelganingni va keyin qayerda bo‘lishingni tushuntir, ko‘rsatib ber.
Ushbu maktubni tezroq ishga kirishishing uchun hozir yozyapman. Ishon, oqibati yomon bo‘lishi mumkin. Agar hozir hammasini to‘g‘ri tushunsang, kelajakda atrofingdagilarni poydevori g‘azab va haqoratlar evaziga qurilgan giyohvandlik balosidan davolanishiga hojat qolmaydi.
Vaqti kelib o‘zing guvohi bo‘lasan: ular mustaqil ravishda o‘sayotgani, rivojlanayotgani, oldiga qo‘ygan vazifalarini bajarayotganini ko‘rasan. Shunda o‘rtadagi munosabatlaring aslida shunday bo‘lishi kerak ekanligini tushunib yetasan.
Senga yanada ko‘proq yozishim mumkin edi. Biroq sen endigina 17 yoshdasan. Va sening e’tiboringni 2000 dan ortiq so‘zga qarata olmasligimni ham yaxshi bilaman.
Keyingi safar biznesda qarindoshlar bilan qanday qilib munosabat yuritish haqida hikoya qilib beraman. Hozir esa bir narsani yaxshilab eslab qol: ota-onang moliyaviy ta’minotching bo‘lib emas, balki har doim ota-onang bo‘lib qolishi kerak.
Birinchi shartnomangga imzo chekishdan oldin, uning qaysi qismi yaqinlaringning go‘zal hayotiga, qaysi qismi esa biznesingni rivojlantirish va daromadlaringni ko‘paytirishga ketishini o‘ylab ko‘r.
Shu tariqa sening nevara, chevaralaring ham oilaning kelajak avlodlariga sarmoya kiritish imkoniyatiga ega bo‘lishi, sen boshlagan yo‘lni davom ettirishlari mumkin.
Tez orada sening hayoting o‘zgarib ketadi. Ko‘p narsalar tezda yo‘q bo‘lib ketadi. Biroq navbatdagi 9 soatlik mashg‘ulotlardan so‘ng dam olishga yotgan vaqting bularni barchasini unutishga harakat qil.
Hayotingni hozirdan rejalashtira boshlasang, kelajakda duch kelishing mumkin bo‘lgan ko‘plab muammolarning oldini olgan bo‘lasan. Hattoki hozirgi ba’zilarini ham!
Cheksiz muhabbat ila Kobi!
2016-yil, 21-iyul
Amerikalik afsonaviy basketbolchi Kobi Brayant 2020-yil, 26-yanvar kuni vertolyot halokati natijasida vafot etdi. U bilan birga 13 yoshli qizi Janna ham dunyodan ko‘z yumdi. “Qora mamba” laqabi bilan mashhur bo‘lgan Kobi “Los-Anjeles Leykers” bilan besh marta NBA chempionligini qo‘lga kiritgan. Shuningdek, u AQSh terma jamoasi bilan Pekin—2008 va London—2012 Olimpiadalarida g‘olib chiqqan. Brayant 2016-yilda faoliyatini yakunlagan edi. Ushbu maktub esa The Players’ Tribune uchun sportchi tomonidan 2016-yil, 21-iyulda yozilgan edi.
Izoh (0)