2020-yil, 26-yanvar kuni NBA’ning afsonaviy basketbolchisi Kobi Brayant shaxsiy vertolyotida halokatga uchrab voqea joyida vafot etdi. Ushbu fotomaqola orqali Brayant faoliyatiga oid ma’lumatlar taqdim etiladi.
Kobi Brayant 1978-yilning 23-avgustida Filadelfiyada professional basketbolchi Jo Brayant oilasida tug‘ilgan. Bolaligi Italiyada o‘tgan, uning otasi o‘sha vaqtlari italyan klublarida faoliyat yuritardi. Uch yoshidan boshlab basketbol o‘ynashni boshlagan. Yoshligidan “Los-Anjeles Leykers” ishqibozi bo‘lgan.
1991-yilda Brayantning oilasi Italiyadan AQShga qaytadi. Filadelfiyada Kobi maktab basketbol jamoasida o‘ynashni boshladi, uning jamoasi shtat chempioniga aylandi. Maktabdan keyin 1996-yilda “Sharlott Hornets” klubida NBA’dagi faoliyatini boshladi, shundan keyin “Los-Anjeles Leykers”ga o‘tdi.
“LA Leykers”dagi 20 yillik faoliyati mobaynida Kobi Brayant besh bor NBA chempionligini qo‘lga kiritdi (2000, 2001, 2002, 2009 va 2010-yillarda) va 2008/09-yilgi mavsumning eng yaxshi o‘yinchisi deb topildi. 2009 va 2010-yillari NBA final bosqichining eng yaxshi basketbolchisiga aylandi. Shuningdek, u 18 marta NBA yulduzlari uchrashuvida qatnashdi, 15 bor yulduzlar terma jamoasidan o‘rin oldi.
Brayant o‘zini “Qora mamba” deb atardi. Bu ilonning hujumdagi mukammal harakati va o‘z salohiyatidan unumli foydalana olishi Kobini ilhomlantirgandi.
Brayant o‘zining sermahsulligi bilan mashhur. U faoliyati mobaynida 33 643 ochko to‘plashga erishgan va NBA tarixidagi eng yaxshi o‘nta mergan ro‘yxatiga kirgan
Xalqaro faoliyati mobaynida Brayant AQSh terma jamoasi bilan ikki bor Olimpiadada chempion bo‘lgan (2008 va 2012-yillarda), shuningdek, 2007-yilda Amerika chempionatida oltin medalga ega chiqqan
Brayant eng ko‘p daromad ko‘radigan sportchilardan biri edi. Uning Nike, Adidas, Coca-Cola, Turkish Airlines, Nutella va boshqa kompaniyalar bilan tuzgan bitimlari katta daromad olib kelardi. Shuningdek, Kobi Nintendo va Kobe Inc. kompaniyalari bilan birga shaxsiy video o‘yinlar seriyasini chiqargan.
Kobi Brayant AQSh shaharlarida bolalar uchun kompleks dasturlar yaratish bilan shug‘ullanadigan After School All Stars notijorat kompaniyasining elchisi edi. Shuningdek, Kobi Xitoyda ta’lim va sog‘liqni saqlash sohasidagi dasturlarni qo‘llab-quvvatlovchi fondni ishga tushirgan. 2019-yili Brayant basketbol bo‘yicha Jahon chempionati FIBA’ning Xitoydagi rasmiy elchisi etib tayinlangandi.
2017-yilda Kobe Inc. va animator Glen Kin studiyasi hamkorlikda “Qadrli basketbol” nomli besh daqiqalik multfilmni namoyish etdi. Multfilm Brayant faoliyatini yakunlagan vaqtda yozgan xati asosida ishlangandi.
2018-yilning mart oyida Brayant “Qadrli Basketbol” uchun eng yaxshi qisqametrajli multfilm yo‘nalishida “Oskar” mukofotiga ega bo‘ldi.
2020-yilning 26-yanvar kuni bortida Brayant bo‘lgan shaxsiy vertolyot Kalabasas shahrida halokatga uchradi. Vertolyot bortida bo‘lgan besh yo‘lovchining barchasi vafot etdi. Kobi Brayant 41 yoshda edi.
Vertolyotda Kobining 13 yoshli qizi Janna Brayant ham bo‘lgan. Kobi Jijini o‘zining basketboldagi vorisi deb bilar va uning mashg‘ulotlarini muntazam kuzatib borardi.
Izoh (0)