Shu kunlarda OAVda Samarqand viloyati gaz ta’minoti tizimidagi huquqbuzarliklar haqida ma’lumotlar tarqaldi. Bu haqda “Hududgazta’minot” AJ matbuot xizmati ma’lum qildi.

Foto: Samarqand viloyati hokimligi

Mazkur xabarning asosiy manbasi deb hisoblanayotgan, Bosh prokuratura huzuridagi Majburiy ijro byurosi Samarqand viloyati boshqarmasi tomonidan taqdim etilgan press-relizda “Hududgaz Samarqand” MChJning mansabdor shaxslari yanvar—oktabr oylarida 363 milliard 155 million 500 ming so‘mlik noreal debitorlik qarzlarini shakllantirish hamda davlat manfaatlariga zarar yetkazishda ishtirok etganliklari haqida ma’lum qilingan.

Matbuot xizmatiga ko‘ra, “Hududgaz Samarqand” MChJ 2019-yil 5-sentabr kuni tashkil etilgan bo‘lib, asosiy vazifasi gaz taqsimlash tarmoqlari va tegishli jihozlardan foydalanish hisoblanadi. E’lon qilingan xabarda o‘tgan yil yanvar oyidan oktabr oyigacha bo‘lgan davr haqida so‘z boradi, bu esa o‘z-o‘zidan ushbu MChJ faoliyati bilan bog‘liq bo‘lmagan ma’lumotlar tarqatilganini yana bir bor tasdiqlaydi.

Ta’kidlash joizki, tabiiy gazni barcha iste’molchilarga sotish “O‘ztransgaz” AJ gaz ta’minoti hududiy filiallari tomonidan amalga oshiriladi.

“Shu munosabat bilan ‘Hududgazta’minot' AJ Bosh prokuratura huzuridagi Majburiy ijro byurosining Samarqand viloyati boshqarmasi tomonidan mazkur masalaga aniqlik kiritilishini maqsadga muvofiq deb hisoblaydi”, — deyiladi xabarda.