Шу кунларда ОАВда Самарқанд вилояти газ таъминоти тизимидаги ҳуқуқбузарликлар ҳақида маълумотлар тарқалди. Бу ҳақда «Ҳудудгазтаъминот» АЖ матбуот хизмати маълум қилди.
Мазкур хабарнинг асосий манбаси деб ҳисобланаётган, Бош прокуратура ҳузуридаги Мажбурий ижро бюроси Самарқанд вилояти бошқармаси томонидан тақдим этилган пресс-релизда «Ҳудудгаз Самарқанд» МЧЖнинг мансабдор шахслари январь—октябрь ойларида 363 миллиард 155 миллион 500 минг сўмлик нореал дебиторлик қарзларини шакллантириш ҳамда давлат манфаатларига зарар етказишда иштирок этганликлари ҳақида маълум қилинган.
Матбуот хизматига кўра, «Ҳудудгаз Самарқанд» МЧЖ 2019 йил 5 сентябрь куни ташкил этилган бўлиб, асосий вазифаси газ тақсимлаш тармоқлари ва тегишли жиҳозлардан фойдаланиш ҳисобланади. Эълон қилинган хабарда ўтган йил январь ойидан октябрь ойигача бўлган давр ҳақида сўз боради, бу эса ўз-ўзидан ушбу МЧЖ фаолияти билан боғлиқ бўлмаган маълумотлар тарқатилганини яна бир бор тасдиқлайди.
Таъкидлаш жоизки, табиий газни барча истеъмолчиларга сотиш «Ўзтрансгаз» АЖ газ таъминоти ҳудудий филиаллари томонидан амалга оширилади.
«Шу муносабат билан ‘Ҳудудгазтаъминот' АЖ Бош прокуратура ҳузуридаги Мажбурий ижро бюросининг Самарқанд вилояти бошқармаси томонидан мазкур масалага аниқлик киритилишини мақсадга мувофиқ деб ҳисоблайди», — дейилади хабарда.
Изоҳ (0)