Iroq parlamenti mamlakat hukumatidan 2014-yilgi kelishuvning amal qilishini to‘xtatish haqida iltimos bitilgan rezolyutsiyani ma’qullab ovoz berdi — ushbu kelishuv AQSh va boshqa mamlakatlarga Iroq hududiga o‘z qo‘shinlarini joylashtirishga ruxsat berar edi.
Bloomberg’ning xabar berishicha, rezolyutsiyani ma’qullab parlament majlisida qatnashgan 172 nafar deputatning bari ovoz bergan. Hujjat parlamentda ko‘pchilik o‘rin egasi hisoblangan shia deputatlar tomonidan qo‘llab-quvvatlangan. Ayni vaqtda salkam 160 nafar deputat, asosan kurd va sunniy deputatlar ovoz berish jarayoniga kelmagan.
Rezolyutsiya Iroq hukumati tomonidan tasdiqlanishi lozim. Bundan tashqari, Associated Press’ning aniqlik kiritishicha, hujjat haqiqatan ham tasdiqlanadigan bo‘lsa, Iroqdan o‘z qo‘shinlarini olib chiqib ketish uchun AQShda bir yil vaqt bo‘ladi.
Iroq parlamentidagi ushbu ovoz berish AQShning Bag‘dodga bergan aviazarbasidan so‘ng bo‘lib o‘tdi — ushbu aviazarba oqibatida eronlik general Qosim Sulaymoniy va iroqlik bir necha nafar yuqori martabali mulozimlar halok bo‘lgan edi.
Hozirda Iroq hududida taxminan 5,2 ming nafar amerikalik askar bo‘lib, ular IShID terrorchilik tashkilotiga qarshi kurashish maqsadida kelgan. Amerika harbiy bazalari asosan kurdlar va sunniylar istiqomat qiladigan hududlarda joylashgan va nazariy jihatdan ular qo‘shinlarni chiqarib yuborish haqidagi talabga bo‘ysunmasligi mumkin.Mavzuga doir: AQSh va Eron o‘rtasidagi urush muqarrarmi?
Izoh (0)