“2 ta mashinamni haydab qochib, qirib keldi”. Madina Muxtorova o‘g‘lining kaltaklanishi sabablarini aytdi (video)

Aktrisa Madina Muxtorovaning bir o‘g‘li boshqa o‘g‘li tomonidan kaltaklanishi holati so‘nggi kunlarda eng ko‘p muhokama qilingan mavzu bo‘ldi.

Ushbu holat yuzasidan 4-yanvar kuni Yunusobod tumani IIB FMBda jurnalist va blogerlar uchun brifing tashkil etildi. Brifingda aktrisa Madina Muxtorova ishtirok etdi hamda keng jamoatchilikni qiziqtirgan ko‘plab savollarga javob berdi. Xususan, u o‘g‘lini o‘zi urgani, ona sifatida bunga haqqi borligini aytdi.

Tadbirda Yunusobod tumani prokurori Habibulla Mirsoatov 13 yoshli bolaning kaltaklanishi holati yuzasidan jinoyat ishi ochilganini aytib o‘tdi. Shuningdek Yunusobod tumani hokimligi vasiylik va homiylik organi mutaxassisi Muxlisa Qosimova Madina Muxtorova onalik huquqidan mahrum etilishi mumkinligini ta’kidlab o‘tdi.

Holat yuzasidan qator ma’lumot berilganiga qaramay, ayrim savollar ochiq qolayotgan edi. “Kaltaklangan bolani videoga olib, internetga tarqatishdan maqsad nima edi?”, “13 yoshli bola shu darajada kaltaklanishga loyiq qanday ayb ish qilgan edi?”, “Bola ikkinchi videomurojaatida grimda ekanligini aytgandi. Agar u rostan ham kaltaklangan bo‘lsa, grim qilishdan maqsad nima edi?”. Shu kabi savollarga javob olish maqsadida bloger Shuhrat Musayev Madina Muxtorova xonadoniga tashrif buyurdi.

Suhbat chog‘ida Madina Muxtorova 13 yoshli o‘g‘lining nima sababdan kaltaklanganiga aniqlik kiritadi.

“Menga olingan mashinalarni haydab chiqib ketadigan odat chiqardi. Bir marta qirib keldi, akalariga ish orttirdi. Yaxshi gap bilan tushuntirdik, tushunmadi. Ikkinchi mashinamni katta trassaga haydab chiqib ketdi. Shu sababli hozir mashinasiz qoldim. Hozir jamoat transportida yuribman. Kechki payt qayerga ketayotganini aytmay chiqib ketadigan odat chiqardi. Velosipedlarini haydab chiqib, velosipedsiz qaytadi. Qani velosipeding, deb so‘rasam telefonga almashtirib yubordim, deydi. Shu darajaga yetdiki, bunga mening kuchim yetmay qoldi. Kelinimdan o‘g‘limdan buni tarbiyalashga yordam berishini so‘radim. Katta o‘g‘lim judayam qattiqqo‘l. Buning qilgan ishlarini katta o‘g‘limdan yashirish maqsadida jarohatlarini bo‘rttirib ko‘rsatib, ‘mana qilgan ishiga yarasha jazo oldi’ deb ko‘rsatish uchun urgan joylarimizga yana grim qilib, videoga olib akasiga jo‘natmoqchi edim. Tarqatish niyatim yo‘q edi”, — deydi aktrisa.