Samarqand viloyatining Oqdaryo tumanida yashovchi F.U.ni “Qum-ota buva” fermer xo‘jaligi dalasida fermer xo‘jaligi raisining ukalari haqoratlab, kaltaklagani haqida xabar berilgan edi. Fuqaro F.U.ga nisbatan zo‘ravonlik qilgan shaxslarga nisbatan sud hukmi o‘qildi. Bu haqda “Daryo” muxbiri xabar berdi.
Ma’lum bo‘lishicha, 2018-yilning 26-oktabr kuni soat 03:00 atrofida I.O‘. o‘zganing mulkini ochiqdan-ochiq talon-toroj qilish maqsadida, akasi B.O‘. bilan oldindan jinoiy til biriktirib, mahalladoshi F.U.ni go‘yoki Oqdaryo tumanidagi “Qum-ota buva” fermer xo‘jaligi yer maydonida ekib parvarishlagan mosh poyasini o‘g‘irlashda gumon qilib uni ushlab olgan.
I.O‘. o‘zining jinoiy xatti-harakatlarini davom ettirib, akasi B.O‘. bilan F.U.ni urib, do‘pposlab, uni og‘riqli ta’sirlar bilan qiynagan. Shuningdek, F.U.ga jismoniy azob berib, uning belida bo‘lgan qizil rangli piyoz xalta bilan qo‘llarini orqaga qayirib bog‘lab, unga zo‘rlik ishlatish yo‘li bilan g‘ayriqonuniy ravishda ozodlikdan mahrum qilgan. Qiynoq holatini tasvirga olib, tayyorlangan zo‘ravonlikni targ‘ib qiluvchi videoni ijtimoiy tarmoqlarda joylashtirgan.
Bundan tashqari I.O‘. akasi B.O‘.ga F.U.ga hayoti va sog‘lig‘i uchun xavfli bo‘lmagan zo‘rlik ishlatib, uni do‘pposlagan. Qulog‘ida bo‘lgan bir juft bahosi 2 000 000 so‘mlik tilla sirg‘alari va bir dona 1 000 000 so‘mlik Samsung Galaxy J-1 ACE rusumli telefon apparatini, umumiy bahosi 3 000 000 so‘mlik mol-mulklarini ochiqdan ochiq talon-toroj qilgan.
Jinoyat ishlari bo‘yicha Oqdaryo tumani sudining raisi Ilyos Doniyorovning ma’lum qilishicha, I.O‘. O‘zbekiston Respublikasi Jinoyat Kodeksi 110-moddasi 1-qismi (Muttasil ravishda do‘pposlash yoki boshqa harakatlar bilan qiynash), 130-1-moddasi 2-qismi “b” bandi (Biri guruh shaxslar tomonidan oldindan til biriktirib zo‘ravonlikni yoki shafqatsizlikni targ‘ib qiluvchi mahsulotni tarqatish), 138-moddasi 2-qismi “a” bandi (jismoniy azob berib, zo‘rlik ishlatib g‘ayriqonuniy ravishda ozodlikdan mahrum qilish) va 166-moddasi 2-qismi “a,v” bandlari (hayot va sog‘liq uchun xavfli bo‘lmagan zo‘rlik ishlatib; bir guruh shaxslar tomonidan oldindan til biriktirib talonchilik sodir etish)da nazarda tutilgan jinoyatlarni sodir etganlikda aybli deb topilib, 3 yil 6 oy ozodlikdan mahrum qilish jazosi tayinlandi.
Sudlanuvchi B.O‘. O‘zbekiston Respublikasi Jinoyat Kodeksining 28,110-moddasi 1-qismi, 130-1-moddasi 2-qismi “b” bandi, 28,138-moddasi 2-qismi “a” bandi va 166-moddasi 2-qismi “a,v” bandlarida nazarda tutilgan jinoyatlarni sodir etganlikda aybli deb topilib, 4 yilga ozodlikni cheklash jazosi tayinlandi.
Izoh (0)