Mudofaa vazirligiga qarashli “Kattaqo‘rg‘on” okrug dala-o‘quv maydonida Janubi-g‘arbiy maxsus harbiy okrug harbiy qismlarining reaktiv artilleriya batareyasi bilan jangovar otish bo‘yicha taktik o‘quvlari bo‘lib o‘tdi. Bu haqda vazirlikning Axborot va ommaviy kommunikatsiya departamenti “Daryo”ga ma’lum qildi.
Divizion komandirlari o‘quv rahbarligida harbiy texnikalar kolonna bo‘lib zaharlangan va minalashtirilgan hududlarda harakatlandi. Bu esa harbiy xizmatchilarning malakasini yana bir bor sinovdan o‘tkazishga xizmat qildi.
“122 mmli artilleriya gaubitsasi, 152 mmli artilleriya pushkasi hamda 122 mmli reaktiv artilleriya qurollaridan jangovar o‘t ochish chog‘ida qo‘qqisdan dushman hujumi sodir etilganda uning oldini olish amaliyotlari ham harbiylarning jangovar shayligini oshirishda muhim omil bo‘ldi”, — deyiladi xabarda.
Eslatib o‘tamiz, O‘zbekistondagi eng katta poligon — Markaziy harbiy okrugga qarashli “Kattaqo‘rg‘on” dala-o‘quv maydoni noyabr oyida foydalanishga topshirilgan edi.
Izoh (0)