Avvalroq Chiroqchi tumani “Langar” MFY Tutli qishlog‘ilik oilaning yetti nafar a’zosi uy sharoitida tayyorlangan pomidor konservasidan zaharlanib, viloyat markazidagi shifoxonalarga yotqizilgani haqida xabar berilgandi. Sog‘liqni saqlash vazirligi jamoatchilik bilan aloqalar bo‘limining ma’lum qilishicha, ko‘rsatilgan tibbiy yordamga qaramasdan 20-noyabr kuni 09:30 da mazkur oilaning katta farzandi, 2006-yilda tug‘ilgan A.T. ham vafot etgan.
Respublika shoshilinch tibbiy yordam ilmiy markazi viloyat filialiga keltirilgan oila boshlig‘i, uning turmush o‘rtog‘i va katta o‘g‘liga botulizm kasalligining og‘ir darajasi, o‘tkir toksemiya davri, toksik neyropatiya, o‘tkir nafas yetishmovchiligi I darajasi tashxisi qo‘yilgan edi. 18-noyabr kuni 08:00 da mazkur oila boshlig‘ining turmush o‘rtog‘i Yu.U. vafot etgandi. Ayni paytda otaning ahvoli ham o‘ta og‘irligicha qolmoqda.
Hozirda oilaning qolgan to‘rt nafar a’zosi viloyat yuqumli kasalliklar shifoxonasida davolanmoqda. Ularning ahvoli qoniqarli.
“Botulizm kasalligini xonadon sharoitida o‘z bilganicha davolashni qat’iyan man etadi. Bunday vaziyatda zudlik bilan shifokorga murojaat qilish kerak. Aks holda kasallikning og‘ir shakllari – yurak, qon-tomir va nafas tizimi xastaliklari yuzaga kelishi, buning natijasida bemorning hayoti xavf ostida qolishi mumkin”, — deya ogohlantiradi Sog‘liqni saqlash vazirligi.
Izoh (0)