O‘zbekiston Axborot texnologiyalari va kommunikatsiyalarini rivojlantirish vazirligi va IT-Park tomonidan Birlashgan Arab Amirliklaridan bo‘lgan hamkorlar bilan birgalikda yaratilgan, mukofot jamg‘armasi 100 ming AQSh dollarini tashkil etadigan mobil ilovalarni ishlab chiqish bo‘yicha talabalar o‘rtasida “mGovAward” tanlovining yo‘l shousi yakunlandi.

Foto: “IT-park matbuot xizmati”

2019-yil 11-noyabr kuni “mGovAward” tanlovi doirasida O‘zbekiston oliy o‘quv yurtlari bo‘ylab o‘tkazilgan keng miqyosli road-shou yakunlandi. IT-Park vakillari respublikaning 12 ta viloyatiga va Qoraqalpog‘iston Respublikasida bo‘lib, 53 ta universitet va institutlarning 4 700 nafardan ortiq talabalari bilan suhbatlashgan.

IT-Park matbuot xizmatining ma’lum qilishicha, mazkur road-shoudan ko‘zlangan maqsad O‘zbekiston oliy o‘quv yurtlari talabalarini iqtidorli va yosh dasturchilarni birinchi milliy ko‘rik-tanlov bilan tanishtirish, tanlov shartlari va talablarini tushuntirish va noyob IT-mahsulotlarni yaratishda istiqbolli kadrlarni rag‘batlantirishdir.

Foto: “IT-park matbuot xizmati”

Qayd etilishicha, “mGovAward” respublika ko‘rik-tanloviga arizalar qabul qilish hali ham davom etmoqda. Arizalarni 2019-yil 1-yanvargacha quyidagi havola orqali yuborish lozim.

“MGovAward” — bu eng yaxshi mobil ilovalarni ishlab chiqish bo‘yicha respublika ko‘rik-tanlovidir. Tanlovning maqsadi oliy o‘quv yurtlari talabalarining IT-dasturlarni ishlab chiqish borasidagi salohiyatini rivojlantirish va kuchaytirish hamda yoshlarning axborot-kommunikatsiya texnologiyalari sohasidagi tashabbuslarini qo‘llab-quvvatlashdir.

Tanlov jami 5 ta: ta’lim, sog‘liqni saqlash, turizm, transport va logistika, shuningdek, biznes va G2B yo‘nalishlarida tashkil qilinadi. Mazkur tanlovning asosiy mezonlari etib yaratiladigan ilovaning samaradorligi, uning innovatsionligi va foydalanish uchun qulayligi belgilangan.

Foto: “IT-park matbuot xizmati”

Talabalar “mGovAward” tanlovi doirasida O‘zbekistondagi mavjud muammolardan birini hal qila oladigan mobil ilova yaratishi kerak. Yutuq fondi 100 ming dollarni tashkil qilib, 50 ming dollar birinchi o‘rin, 30 ming dollar ikkinchi o‘rin hamda 20 ming dollar uchinchi o‘rin sohibiga berish rejalashtirilgan. Shuningdek, tanlov g‘oliblari BAAga bepul safar qilish imkoniyatini va IT-Park akseleratsiya dasturida ishtirok etish imkonini qo‘lga kiritadi.