AQSh prezidenti Donald Tramp Turkiya davlat rahbari Rajab Toyyib Erdo‘g‘on bilan uchrashuvdan keyin o‘tkazilgan matbuot anjumanida IShID yetakchisi Abu Bakr al-Bag‘dodiy yo‘q qilingach, uning o‘rnini egallagan terrorchining ta’qibdan qochib, yashirinib yurganini ma’lum qildi.

Foto: WDTN

Tramp AQShning Turkiyadagi hamkorlariga Bag‘dodiy va uning eng yaqin yordamchisi Idlibdagi maxsus operatsiyada yo‘q qilinganini eslatgan.

“Biz IShID terrorchilik tashkilotidagi uchinchi raqamli terrorchini kuzatishni davom ettiramiz. U Bag‘dodiy o‘rnini egallashi kerak, biroq qochqinda yuribdi. U bizdan qochib jonini saqlab qolmoqchi, lekin AQSh uni navbatdagi muhim nishoniga aylantirgan”, – deydi AQSh prezidenti.

Abu Bakr al-Bag‘dodiy 27-oktabrda Suriyaning Idlib viloyatida AQSh harbiylarining havodan yo‘llagan hujumi natijasida o‘lgan. AQSh prezidenti Donald Tramp Iroq, Suriya, Amerika, Rossiya, Turkiya va kurdlarga operatsiyadagi hamkorlik uchun minnatdorchilik bildirgan va Bag‘dodiyning o‘limi haqidagi ma’lumotni rasman tasdiqlagan. IShID sobiq rahbarining jasadi qoldiqlari dengizga oqizilishi va tashkilot rahbarligini kelib chiqishi turkman millatiga mansub iroqlik sobiq zobit Abdulla Qardosh egallashi taxmin qilingandi. Keyinchalik IShID vakillari ham rahnamo halok bo‘lganligini tasdiqladi va AQShdan qasos olishni va’da berdi. IShID terroristik tashkilotida Bag‘dodiyning o‘rnini Abu Ibrohim al-Hoshimiy al-Qurayshiy egallagan. 4-noyabr, yakshanba kuni Suriyaning Aleppo viloyatida Turkiya harbiylari Bag‘dodiyning opasi 65 yoshli Rasmiya Avad va uning oila a’zolarini qo‘lga olgan. 7-noyabrda AQSh davlat departamenti IShID terrorchilik tashkilotining yetakchisi Abu Bakr al-Bag‘dodiyning o‘rnini egallagan yangi rahnamo ham tez orada yo‘q qilinishini ma’lum qildi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.