Трамп Ал-Бағдодий ўрнини эгаллаган ИШИДнинг янги раҳбари қочқинда юрганини маълум қилди

АҚШ президенти Дональд Трамп Туркия давлат раҳбари Ражаб Тоййиб Эрдўғон билан учрашувдан кейин ўтказилган матбуот анжуманида ИШИД етакчиси Абу Бакр ал-Бағдодий йўқ қилингач, унинг ўрнини эгаллаган террорчининг таъқибдан қочиб, яшириниб юрганини маълум қилди.

Трамп АҚШнинг Туркиядаги ҳамкорларига Бағдодий ва унинг энг яқин ёрдамчиси Идлибдаги махсус операцияда йўқ қилинганини эслатган.

«Биз ИШИД террорчилик ташкилотидаги учинчи рақамли террорчини кузатишни давом эттирамиз. У Бағдодий ўрнини эгаллаши керак, бироқ қочқинда юрибди. У биздан қочиб жонини сақлаб қолмоқчи, лекин АҚШ уни навбатдаги муҳим нишонига айлантирган», – дейди АҚШ президенти.

Абу Бакр ал-Бағдодий 27 октябрда Суриянинг Идлиб вилоятида АҚШ ҳарбийларининг ҳаводан йўллаган ҳужуми натижасида ўлган. АҚШ президенти Дональд Трамп Ироқ, Сурия, Америка, Россия, Туркия ва курдларга операциядаги ҳамкорлик учун миннатдорчилик билдирган ва Бағдодийнинг ўлими ҳақидаги маълумотни расман тасдиқлаган. ИШИД собиқ раҳбарининг жасади қолдиқлари денгизга оқизилиши ва ташкилот раҳбарлигини келиб чиқиши туркман миллатига мансуб ироқлик собиқ зобит Абдулла Қардош эгаллаши тахмин қилинганди. Кейинчалик ИШИД вакиллари ҳам раҳнамо ҳалок бўлганлигини тасдиқлади ва АҚШдан қасос олишни ваъда берди. ИШИД террористик ташкилотида Бағдодийнинг ўрнини Абу Иброҳим ал-Ҳошимий ал-Қурайший эгаллаган. 4 ноябрь, якшанба куни Суриянинг Алеппо вилоятида Туркия ҳарбийлари Бағдодийнинг опаси 65 ёшли Расмия Авад ва унинг оила аъзоларини қўлга олган. 7 ноябрда АҚШ давлат департаменти ИШИД террорчилик ташкилотининг етакчиси Абу Бакр ал-Бағдодийнинг ўрнини эгаллаган янги раҳнамо ҳам тез орада йўқ қилинишини маълум қилди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.