Andijon viloyati hokimi Shuhratbek Abdurahmonov shoir Sharofiddin Boltaboyevga Chevrolet Nexia sovg‘a qildi, deya xabar bermoqda “Daryo” muxbiri Musulmonbek Ibrohimov.

Foto: Andijon viloyati hokimligi

Ijtimoiy tarmoqlarda viloyat hokimi tomonidan terimchilarga bo‘layotgan rag‘batni ko‘rib yuragim toshib ketdi. O‘zimiz ham paxtaning ichida o‘sganmiz, bolalikni qo‘msab, ham dam olishni reja qildim. Shu bois paxta terib, paxtakorlarga hormang deyish maqsadida va, o‘zimcha, hokimdan mashina olishni yaxshi niyat qilib, Andijon tomon yo‘lga chiqdim. Farzandlarim “Shanba va yakshanba kunlari biz ham sizga paxta terishda yordam beramiz”, deb meni ruhlantirishdi. Uch kun tumanlarda bo‘lib, paxta terdim. She’rlar o‘qib, paxtakorlar bilan suhbatlar qurdim.

Bundan yetti yil avval, Shuhratbek Abdurahmonov Andijon viloyatiga hokim bo‘lganida, Mustaqillik bayrami uchun she’r yozib bergandim va u qo‘shiq bo‘lgan. Shundan buyon viloyatdagi bayramlar uchun she’rlar yozib kelaman.

Mashina berilishidan uch kun avval viloyat hokimi Shuhratbek Abdurahmonov meni qabuliga chaqirib, o‘tgan yetti yil ichida Andijonda bo‘layotgan o‘zgarishlar haqida zo‘r qo‘shiq uchun yaxshi she’r yozib berishimni so‘radi. Shuhratbek Qo‘shoqboyevich suhbat davomida ancha yillardan buyon bayramlarni ko‘ngildagidek o‘tkazishga qo‘shib kelayotgan hissam uchun u meni Toshkentga moshina mindirib jo‘natish niyati borligini aytdi.

Sharofiddin Boltaboyev, shoir

Shoir Andijon viloyati hokimi tomonidan ilg‘or terimchilarga mashina sovg‘a qilinayotgani haqida “Paxta tergim kelyapti” nomli she’r yozgan:

Foto: Rustam Eshonov / “Daryo”

Zo‘r tashviqot, da’vat bu.

Andijoncha ibrat bu.

Terimchiga mashina,

Tantilarcha rag‘bat bu.

Bunaqasi bo‘lmagan,

Yaqin tarix ko‘rmagan,

Oddiy xalqni hech davlat,

Bunday rozi qilmagan.

Bu hayot to‘lqinidan,

Qolmay shahd oqimidan,

Xudo ol qulim desa,

Viloyat hokimidan,

Ravon mingim kelyapti,

Paxta tergim kelyapti.

Andijon viloyati hokimi Shuhratbek Abdurahmonovning “Daryo” muxbiriga ma’lum qilishicha, shoir Sharofiddin Boltaboyevga sovg‘a sifatida toshpirilgan avtomobil andijonlik homiylar hisobidan, u Andijonni madh etgani uchun taqdim etilgan.

Foto: Rustam Eshonov / “Daryo”

Avvalroq Andijon viloyati terimchilarga taqdim etilgan avtomobillar klasterlar hisobidan berilgani va bunda viloyat hokimi faqatgina sovg‘a berishda qatnashgani ma’lum qilingan edi.