Andijon viloyati hokimi Shuhrat Abdurahmonov eng faol terimchi deb topilgan qo‘rg‘ontepalik Iroda Karimovaga Ravon Nexia avtomobilini topshirdi, deya xabar bermoqda viloyat hokimligi matbuot xizmati.

Foto: Facebook / @andpress

Xabar berishlaricha, Iroda Karimova “Dardoqtepa” mahalla fuqarolar yig‘inida istiqomat qiladi. “Paxta mavsumi boshidan o‘z turmush o‘rtog‘i bilan to‘rt kunda davlatga 2,5 tonna ‘oq oltin’ terib topshirgan”, — deyiladi hokimlik axborotida.

Foto: Facebook / @andpress

Qo‘shimcha qilishlaricha, 23-sentabr kuni Navoiy massividagi “Kelajak sadoqati” fermer xo‘jaligida o‘tkazilgan uchrashuvda hokim Abdurahmonov terimchilarga “ko‘rsatayotgan qahramonliklari uchun” o‘z minnatdorchiligini bildirib, ilg‘orlarga esdalik sovg‘alari ulashgan, faol terimchilarga kir yuvish mashinasi, muzlatgich va dazmollar sovg‘a qilingan.

Foto: Facebook / @andpress

Avvalroq Andijon viloyati hokimi Shuhrat Abdurahmonov bir kunda yarim tonna (ba’zi manbalarga ko‘ra, 300 kilo) paxta tergan ayolga Spark avtomobili sovg‘a qilgani haqida xabar berilgan edi.