Ижтимоий тармоқларда Андижоннинг Жалақудуқ туманидаги стоматология бўлинмасида даволанган аёлнинг гепатит B вирусини юқтиргани ҳақида хабар тарқалди. Андижон вилоят ҳокимлиги матбуот хизматининг маълум қилишича, зудлик билан соҳа мутахассисларидан иборат ишчи гуруҳ тузилиб, мурожаат бўйича ўрганиш ишлари олиб борилди.
Ўрганиш жараёнида мурожаатчи аёл Г.Қ. Андижон вилояти соғлиқни сақлаш бошқармаси Жалақудуқ туман тиббиёт бирлашмасининг хўжалик ҳисобидаги стоматология бўлимида 2012 йилда даволанганини, гепатит B вирусини ҳам ўша вақтда юқтириб олганини айтган.
Г.Қ. нима сабабдан касалликни аниқланган вақтида, яъни 7 йил аввал хабар қилмасдан бугунги кунга келиб хабар қилинаётгани сўралганида, тайинли жавоб бера олмаган. Унинг турмуш ўртоғи М.Қ. ҳам юқоридаги ҳолатларни таъкидлаб, вазиятга ойдинлик киритувчи саволларга тўлиқ жавоб бера олмаган.
Мурожаатда касалликка сабаб қилиб кўрсатилган стоматология бўлинмаси фаолият жараёни билан танишилганда, бўлинмада жами 22 нафар ходим, шундан, 7 нафари олий тоифали шифокор, 2 нафар ҳамшира, 2 нафар санитария ходимлари ва 10 нафар техник ходимлар фаолият кўрсатиши аниқланган. Бўлинмада меҳнат қилувчи барча тиббий ходимлар Соғлиқни сақлаш вазирлигининг 200-сонли буйруғига асосан даврий тиббий кўрикдан ўтказилган. Бино хоналарига ичимлик сув ва канализация тармоғи киритилган, барчаси ишчи ҳолатда.
Муассасада 5 та тиш даволаш хоналари мавжуд бўлиб, хоналар таъмирталаб ҳолатида, стоматологик креслолар ва тиббий анжомлар эскирган. Хоналарда муолажалар учун ташкил этилган қўл ювиш мосламалари ҳам янгиланишга муҳтож. Хоналарнинг санитария ҳолати қониқарсиз. Кунлик тозалов ишлари талаб даражасида олиб борилмаган. Тиш даволаш ва қўйишда фойдаланиладиган тиббий анжомлар ўртасида табиий таъсир оқибатида эскириш ва занглашлар мавжуд.
Шунингдек, стерил ҳисобланган юмшоқ материаллар қуруқ ҳолатда эмаслиги, аксинча нам ҳолатда эканлиги аниқланган. Фойдаланилган қонли пахталар зарарсизлантирилмасдан ташланаётганлиги, беморлардан эпидемиологик таҳлилий маълумотлар умуман йиғилмаётганлиги маълум бўлган.
Юқорида аниқланган камчиликларни бартараф этиш юзасидан соҳа мутахассислари томонидан зарурий тавсиялар берилган. Стоматология бўлинмасининг кейинги иш фаолияти давомида юқоридаги каби ҳолатларга йўл қўймаслик, аниқланган камчиликларни бартараф этиш ҳамда белгиланган қатъий меъёр ва нормаларда ишни қайта ташкил этиш учун бўлинма фаолияти тўхтатилган.
Андижон вилояти соғлиқни сақлаш бошқармаси Жалақудуқ туман тиббиёт бирлашмасининг хўжалик ҳисобидаги стоматология бўлимининг мудири Б.Х. эса лавозимидан четлаштирилган.
Изоҳ (0)