Qoraqalpog‘istonda 3 tonna paxtani qo‘shib yozish uchun 6 million so‘m talab qilgan shaxs ushlandi
Bosh prokuratura huzuridagi Departamentning Qoraqalpog‘iston Respublikasi boshqarmasi xodimlari tomonidan o‘tkazilgan tezkor tadbirda, “Xalqobod paxta tozalash” korxonasiga qarashli “Qorako‘l paxta qabul qilish maskani”da paxtaga qo‘shib yozishga urinish holatining oldi olindi. Bu haqda Bosh prokuratura “Daryo”ga ma’lum qildi.
Xabar berilishicha, paxta qabul qilish maskani operatori S.A., “A.Q.” fermer xo‘jaligi tomonidan maskanga joriy yilning 12, 14 va 16-oktabr kunlari topshirilgan paxta xomashyosiga yana uch tonna paxta xomashyosini qo‘shib yozish va yuk xatlarini qalbakilashtirib berish evaziga, fermer xo‘jaligi rahbari R.A.dan olti million so‘mni talab qilib olgan vaqtida ashyoviy dalillar bilan ushlangan.
Mazkur holat yuzasidan “Qorako‘l paxta qabul qilish maskani” moddiy javobgar shaxslariga nisbatan Jinoyat Kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq, Shumanayda paxtaga qo‘shib yozish holati aniqlangani haqida xabar berilgan edi. Xorazmda esa qariyb 2,5 tonna paxtani qayta topshirmoqchi bo‘lgan shaxslar qo‘lga olingan edi.
