Бош прокуратура ҳузуридаги Департаментнинг Қорақалпоғистон Республикаси бошқармаси ходимлари томонидан ўтказилган тезкор тадбирда, «Халқобод пахта тозалаш» корхонасига қарашли «Қоракўл пахта қабул қилиш маскани»да пахтага қўшиб ёзишга уриниш ҳолатининг олди олинди. Бу ҳақда Бош прокуратура «Дарё»га маълум қилди.
Хабар берилишича, пахта қабул қилиш маскани оператори С.А., «А.Қ.» фермер хўжалиги томонидан масканга жорий йилнинг 12, 14 ва 16 октябрь кунлари топширилган пахта хом ашёсига яна уч тонна пахта хом ашёсини қўшиб ёзиш ва юк хатларини қалбакилаштириб бериш эвазига, фермер хўжалиги раҳбари Р.А.дан олти миллион сўмни талаб қилиб олган вақтида ашёвий далиллар билан ушланган.
Мазкур ҳолат юзасидан «Қоракўл пахта қабул қилиш маскани» моддий жавобгар шахсларига нисбатан Жиноят Кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Аввалроқ, Шуманайда пахтага қўшиб ёзиш ҳолати аниқлангани ҳақида хабар берилган эди. Хоразмда эса қарийб 2,5 тонна пахтани қайта топширмоқчи бўлган шахслар қўлга олинган эди.
Изоҳ (0)