Ichki ishlar vazirligining matbuot xizmatidan olingan ma’lumotlarga ko‘ra, 2016-yil dekabr oyidan buyon O‘zbekistonda yashayotgan fuqarolarning 8 348 nafari O‘zbekiston fuqarosi bo‘ldi.
Bunda 1992-yili qabul qilingan “O‘zbekiston Respublikasining fuqaroligi to‘g‘risida“gi qonun va O‘zbekiston Konstitutsiyasining 93-moddasidagi 22-band asos bo‘lib xizmat qilmoqda.
Mazkur hujjatlar asosida O‘zbekiston fuqaroligiga qabul qilish borasida qabul qilinayotgan Prezident farmonlari soni yildan yilga oshib bormoqda. Xususan, 2016-yilda boshlangan ushbu xayrli tadbir uchun bitta Prezident farmoni qabul qilingan bo‘lsa, 2017-yilda 10, 2018-yilda 15, joriy yilning o‘tgan davrida esa 21 ta farmon ijrosi ta’minlandi. Ayni vaqtda ularning hammasi fuqarolik pasportiga ega.
“Pasport insonning yuragi ekan. Yaratganga shukr, bugun fuqarolik pasportini qo‘limga oldim. Saylovlar yaqin. Men ham endi saylash, saylanish huquqiga egaman. Yurtimizda amalga oshirilayotgan islohotlarda faol ishtirok etib, mamlakatimiz taraqqiyotiga xizmat qilaman”, — deydi 1994-yilda Qirg‘izistondan kelgan va O‘zbekiston fuqaroligini olgan Iqboliddin Abdullayev.
Izoh (0)