Shu yilning 7-oktabr kuni Xorazm viloyati Urganch shahriga Andijondan Qoraqalpog‘istonning Mo‘ynoq tumaniga safarga otlangan Sohib Rajabov Xorazm viloyatiga yetib keldi.
Xorazm viloyati turizmni rivojlantirish departamenti matbuot xizmatining xabar berishicha, Sohib Rajabov safarni boshlaganiga 100 kundan oshgan. U O‘zbekistonning qanchalik xavfsiz davlat ekanligini isbotlash va mamlakatning turistik salohiyatini ko‘rsatish maqsadida o‘z sayohatini piyoda yurib amalga oshirmoqda.
Xorazm bo‘ylab piyoda qilingan safar davomida Sohib Rajabov Urganch shahrining sayyohlik manzillariga tashrif buyurgan. Bundan tashqari, 9-oktabr, chorshanba kuni vohaning eng qadimiy va ertaknamo shahri hisoblangan Xiva shahriga yetib borgan.
10-oktabr, payshanba kuni Xiva shahridagi “Ichanqal’a” davlat muzey qo‘riqxonasi hududida Xorazm viloyat hokimi Farhod Ermanov va Xorazm viloyati hokimining turizm masalalari bo‘yicha o‘rinbosari Temur Davletov Sohib Rajabov bilan uchrashdi.
Viloyat hokimi fuqaro Rajabovga O‘zbekiston turizmini targ‘ib qilishda qilayotgan mehnatlari uchun o‘z minnatdorchiligini bildirgan.
Qayd etilishicha, Sohib Rajabov 10—11-oktabr kunlari Xiva shahrida, 12-oktabr kuni “Xiva qorako‘l” ekoturistik obyekti, 13-oktabr kuni Qo‘shqo‘pir tumani va 14-oktabr kuni Gurlan tumani bo‘ylab sayohatini davom ettiradi.
Eslatib o‘tamiz, Sohib Rajabov 1-iyul kuni Andijon viloyatining Xonobod shahridan Qoraqalpog‘istonning Mo‘ynoq tumaniga (2 200 kilometr masofa) piyoda yo‘lga chiqqan edi. U 70 kun deganda Buxoro shahriga yetib borgandi. Safarini boshlaganidan 3 oy o‘tib, 97 kunda Xorazm viloyatiga yetib keldi.