Fors ko‘rfazi mamlakatlarining mintaqaviy raqobati Afg‘onistonda ham o‘z aksini topmoqda. Bu haqda Afg‘onistonni qutqarish bo‘yicha birlashgan islom fronti “Shimoliy alyans” asoschisi Ahmad Shoh Ma’sudning akasi Ahmad Vali Ma’sud Independent nashriga ma’lum qildi, deb yozmoqda “Afghanistan.ru”. Afg‘onistonning Londondagi sobiq elchisi tomonidan ma’lum qilinishicha, Saudiya Arabistoni va Birlashgan Arab Amirliklari prezidentlik saylovida Afg‘onistonning amaldagi prezidenti Ashraf G‘anini qo‘llab-quvvatlamoqda.
Qatarning diplomatik vositachiligiga izoh bergan holda, Ahmad Vali Ma’sudning aytishicha, Saudiya Arabistoni va BAA Qatarning soyadagi hukumat bo‘lishini istamayapti. Uning qayd etishicha, mazkur ikki mamlakat tinchlik jarayonida asosiy rolni o‘ynashni xohlamoqda. “Ba’zi xorijiy kuchlar doktor G‘anining muvaffaqiyatga erishishini juda xohlamoqda va buning ustida ishlamoqda”, — deb ta’kidlagan u. Ma’sud BAA va Saudiya Arabistoni “Tolibon” harakatini rivojlantirish uchun ko‘p mablag‘ sarflagani va harakat keyinchalik Qatar ta’siri ostiga tushib qolganiga e’tibor qaratgan.
AQSh shafeligi ostida Qatar tinchlik jarayonlari boshlanganidan so‘ng, bu muzokaralarni Saudiya tomonga o‘tkazishga urinilgan, biroq “Tolibon” harakati bir necha marta bunga nisbatan ularning muzokara holatini va rasmiy Qobul bilan muloqot boshlash jarayonini kuchsizlantirish usuli sifatida shikoyat qilgan. “Tolibon” manbalaridan birining Reuters’ga ma’lum qilishicha, Saudiya Arabistoni va Qatar o‘rtasidagi kelishmovchilik amalda tinchlik jarayoniga putur yetkazgan. Uning so‘zlariga ko‘ra, Saudiya tomoni o‘t ochishni to‘xtatish maqsadida siyosiy ofis delegatlariga kuchli bosim o‘tkazmoqda, hatto amerikalik muzokarachilar ham buni talab qilmagan edi.
Fors ko‘rfazidagi arab davlatlari hamkorligi kengashining yetakchi mamlakatlari va Qatar siyosatidagi qarama-qarshilik 2017-yilda namoyon bo‘lgan edi. O‘shanda mustaqil tashqi siyosat sababli Qatar iqtisodiy va diplomatik xarakterdagi qattiq cheklov choralariga duchor bo‘lgan. Arab mamlakatlariga Qatar o‘zining Eron rahbariyati bilan iliq munosabatlari sababli hamkorlik kengashining hamjihatligiga putur yetkazayotgani yoqmagan.
Avvalroq Afg‘oniston prezidentlik saylovida kurash olib borayotgan mamlakatning amaldagi bosh vaziri Abdulla Abdulla ovoz berish natijalari noma’lum bo‘lsa ham, o‘zini saylovda g‘olib deb e’lon qilgan edi.
Afg‘onistonda 28-sentabrda bo‘lib o‘tgan prezidentlik saylovida uchta asosiy siyosiy guruh kurash olib bordi. MSKning qayd etishicha, ovoz berish kuni Afg‘onistondagi 98 foiz saylov uchastkasi ochiq bo‘lgan. Prezident saylovlari kunida uyushtirilgan hujumlarda 32 nafar odam halok bo‘ldi. Shuningdek, “Tolibon” harakati saylovlarda 8 nafar kuzatuvchini o‘g‘irlab ketdi.
Izoh (0)