26-sentabr—1-oktabr kunlari Qashqadaryo viloyatining Kitob tumanidagi Varganza qishlog‘ida birinchi xalqaro “Anor” agrofestivali bo‘lib o‘tadi. Festival ochilishi arafasida OAV vakillari qatorida “Daryo” xodimlari ham Qashqadaryoga jo‘nab ketdi.
Tadbir O‘zbekiston Prezidentining 2018-yil 13–14-dekabr kunlari Qashqadaryo viloyatiga tashrifi davomida Shahrisabz shahrini festivallar shahriga aylantirish bo‘yicha topshirig‘i yuzasidan o‘tkazilmoqda.
27-sentabr, juma kuni festival ishtirokchilari Qashqadaryo xalqaro investitsiya forumiga tashrif buyuradi. Shuningdek, jurnalistlar va xorijiy mehmonlar Shahrisabzning diqqatga sazovor joylari bilan tanishtiriladi.
Tadbirning eng ahamiyatli qismida Shahrisabrzning Koba tarixiy qadamjosida Italiyaning Kazerta shahri meri va Qashqadaryo viloyati hokimi o‘rtasida turizm sohasidagi hamkorlik memorandumini imzolash marosimi bo‘lib o‘tadi.
Turizmni rivojlantirish davlat qo‘mitasi va Qashqadaryo viloyati hokimligi tashabbusi bilan festival kunlari Shahrisabz shahri va Kitob tumanida birinchi turizm qishlog‘ining ochilish marosimi ham o‘tkazilishi rejalashtirilgan.
28-sentabr, shanba kuni Anor festivali Varganza qishlog‘ida bo‘lib o‘tadi.
Anor festivaliga 15 ta xorijiy mamlakatdan mehmonlar kelishi kutilmoqda. Sayyohlar va OAV vakillari Varganza qishlog‘idagi anorzorga borib, mevalarni terish imkoniyatiga ham ega bo‘ladi.
Ma’lumot o‘rnida, 20 ming kishi istiqomat qiladigan Varganza butun respublikaga o‘z anori bilan mashhur. Qishloqda anor eksporti bilan shug‘ullanuvchi 30 nafar tadbirkor faoliyat yuritadi. Ayni paytda qishloqda ming gektar maydonda anor mavjud bo‘lsa, shundan 350 gektari fermer va dehqon xo‘jaligi egalariga tegishli. Qolgani qishloqda yashovchi aholi tomorqasida ekilgan.
Yuqoridagilardan tashqari dasturdan “Kitob kenglik” observatoriyasiga sayohat, Yakkabog‘da ko‘pkari, kurash musobaqalari hamda milliy liboslar namoyishi o‘rin olgan.