26 сентябрь—1 октябрь кунлари Қашқадарё вилоятининг Китоб туманидаги Варганза қишлоғида биринчи халқаро «Анор» агрофестивали бўлиб ўтади. Фестиваль очилиши арафасида ОАВ вакиллари қаторида «Дарё» ходимлари ҳам Қашқадарёга жўнаб кетди.
Тадбир Ўзбекистон Президентининг 2018 йил 13–14 декабрь кунлари Қашқадарё вилоятига ташрифи давомида Шаҳрисабз шаҳрини фестиваллар шаҳрига айлантириш бўйича топшириғи юзасидан ўтказилмоқда.
27 сентябрь, жума куни фестиваль иштирокчилари Қашқадарё халқаро инвестиция форумига ташриф буюради. Шунингдек, журналистлар ва хорижий меҳмонлар Шаҳрисабзнинг диққатга сазовор жойлари билан таништирилади.
Тадбирнинг энг аҳамиятли қисмида Шаҳрисабрзнинг Коба тарихий қадамжосида Италиянинг Казерта шаҳри мери ва Қашқадарё вилояти ҳокими ўртасида туризм соҳасидаги ҳамкорлик меморандумини имзолаш маросими бўлиб ўтади.
Туризмни ривожлантириш давлат қўмитаси ва Қашқадарё вилояти ҳокимлиги ташаббуси билан фестиваль кунлари Шаҳрисабз шаҳри ва Китоб туманида биринчи туризм қишлоғининг очилиш маросими ҳам ўтказилиши режалаштирилган.
28 сентябрь, шанба куни Анор фестивали Варганза қишлоғида бўлиб ўтади.
Анор фестивалига 15 та хорижий мамлакатдан меҳмонлар келиши кутилмоқда. Сайёҳлар ва ОАВ вакиллари Варганза қишлоғидаги анорзорга бориб, меваларни териш имкониятига ҳам эга бўлади.
Маълумот ўрнида, 20 минг киши истиқомат қиладиган Варганза бутун республикага ўз анори билан машҳур. Қишлоқда анор экспорти билан шуғулланувчи 30 нафар тадбиркор фаолият юритади. Айни пайтда қишлоқда минг гектар майдонда анор мавжуд бўлса, шундан 350 гектари фермер ва деҳқон хўжалиги эгаларига тегишли. Қолгани қишлоқда яшовчи аҳоли томорқасида экилган.
Юқоридагилардан ташқари дастурдан «Китоб кенглик» обсерваториясига саёҳат, Яккабоғда кўпкари, кураш мусобақалари ҳамда миллий либослар намойиши ўрин олган.
Изоҳ (0)