“O‘zbekiston” mehmonxonasining ulushlari narxi uchinchi bor arzonlashdi. Bu haqda Davlat aktivlarini boshqarish agentligi xabar berdi.
Endi “O‘zbekiston” MChJ qo‘shma korxonasining 80,13 foizli mehmonxona boshqaruvi huquqini taqdim etadigan paketi 23,1 million AQSh dollariga baholandi. Birinchi marta narx iyul oyi oxirida arzonlashgan (o‘shanda dastlabki narx 33 million AQSh dollari bo‘lgan va xaridor topilmagach 29,7 millionga tushirilgan), ikkinchi pasayish avgust oxirida (26,4 million AQSh dollari) kuzatildi.
Nazorat paketi fevral boshida sotuvga qo‘yilgan. Mehmonxonani sotish qarori o‘tgan yilning avgustida chiqarilgandi. Xaridor korxona hududdagi yerlar, infratuzilma obyektlari va “O‘zbekiston” kompleksi binosidan 99 yil davomida foydalanish huquqiga (tasarruf etish huquqisiz) ega bo‘ladi.
To‘lovni amalga oshirishning maksimal muddati - uch yil. Xaridor ikki yil ichida 100 milliard so‘m miqdorida sarmoya kiritish mas’uliyatini o‘z zimmasiga oladi. Bu pullar mehmonxonani qayta ta’mirlash va modernizatsiya qilishga sarf etiladi.
Mehmonxonaning yangi egasi 10 yil ichida korxonaning asosiy mehmonxona xizmat ko‘rsatish faoliyatini saqlab turishi, binoning tashqi ko‘rinishini o‘zgartirmasligi va boshqaruvga eng ilg‘or menejerlarni jalb etishi lozim. Tanlovda ishtirok etish uchun dastlabki narxning 15 foizidan kam bo‘lmagan oldindan to‘lovni amalga oshirish talab etiladi.
Yaqin orada bildirilgan taklif paketlarini ochish 14-oktabrda o‘tkaziladi.
Toshkentning eng mashhur mehmonxonalaridan biri bo‘lgan “O‘zbekiston” 1974-yilda qurilgan. Bu to‘rt yulduzli mehmonxona poytaxtning eng diqqatga sazovor maskanlaridan biri, ramzi hisoblanadi. Mehmonxonadagi nomerlar soni 223 tani tashkil etadi.
Izoh (0)