Eron Rossiya va Xitoy bilan hamkorlikda harbiy dengiz mashg‘ulotlarini o‘tkazadi. Bu haqda Eron qurolli kuchlari bosh shtabi boshlig‘i o‘rinbosari, brigada generali Qodir Nizomiyga asoslanib, Eronning yarim-rasmiy Tasnim agentligi xabar bermoqda.

Brigada general Qodir Nizomiy.
Foto: Tasnim

Generalning so‘zlariga ko‘ra, o‘quv mashg‘ulotlari “yaqin vaqt ichida” Hind okeanining shimoliy qismida o‘tkaziladi. Bloomberg agentligi Eron tomoni o‘quv mashqlari Fors ko‘rfazida o‘tkazilmasligiga alohida urg‘u berganiga e’tibor qaratgan. Bundan tashqari, o‘quv mashqlari haqidagi bayonot AQSh rasmiylari mintaqaga qo‘shimcha qo‘shin va qurol-yarog‘ jo‘natish niyatini e’lon qilganidan bir kun o‘tar-o‘tmas berilgani ham qayd etib o‘tilgan.

Ayni vaqtda dron va raketalar ishtirokidagi operatsiyalarni to‘xtatganini e’lon qilgan yamanlik isyonchilar G‘arb diplomatlariga Eron Saudiya Arabistoniga qarshi yangi operatsiyaga tayyorgarlik ko‘rayotgani, bunda uchuvchisiz parvoz qiluvchi qurilmalardan foydalanishini ma’lum qilgan. Bu haqda o‘z manbalariga asoslanib, The Wall Street Journal (WSJ) xabar bermoqda.

Yamandagi mojarodagi aynan Eron tomonidan qo‘llab-quvvatlanayotgan isyonchi xusiylarning rasmiy vakillari chet el diplomatlariga hech qanday axborot berilmaganini ta’kidlayotgan bo‘lsa-da, WSJ ma’lumotlariga ko‘ra, norasmiy suhbatlarda G‘arbni ehtimoliy hujumdan ogohlantirmoqda. Ushbu ma’lumotlar allaqachon Vashington va Ar-Riyodda yetkazilgani aytilmoqda.

Eslatib o‘tamiz, Saudiya Arabistonining eng yirik neftni qayta ishlash zavodlariga dronlar vositasida uyushtirilgan hujum mintaqadagi vaziyatning yangitdan keskinlashib ketishiga sabab bo‘ldi. Ushbu hujum uchun javobgarlikni yamanlik xusiylar o‘z zimmasiga oldi. AQSh va Saudiya Arabistoni esa bunda Eronni ayblab chiqdi.

Rasmiy Tehron ushbu hujumga aloqasi yo‘qligini ta’kidlayotganiga qaramay, AQSh Eronga nisbatan yangi sanksiyalar joriy etdi va mintaqaga qo‘shimcha qo‘shin va harbiy texnika yuborilishini ma’qulladi. Eron AQShning bu rejalarini “quruq savlatga zo‘r berish” deb atadi, deya xabar bermoqda “Kommersant”.