Iordaniya poytaxti Ammonda 17-sentabr, seshanba kuni O‘zbekiston va Iordaniya tashqi siyosat idoralari o‘rtasida ilk marotaba siyosiy maslahatlashuvlar bo‘lib o‘tdi, deya xabar bermoqda O‘zbekiston Tashqi ishlar vazirligi matbuot xizmati. Maslahatlashuvlar vaqtida O‘zbekiston delegatsiyasiga tashqi ishlar vaziri o‘rinbosari Dilshod Ahatov, Iordaniya tomoniga esa tashqi ishlar va muhojirlar masalalari bo‘yicha vazirlik bosh kotibi Saja al-Majaliy boshchilik qilgan.

Foto: O‘zbekiston Tashqi ishlar vazirligi matbuot xizmati

“Siyosiy maslahatlashuvlarda Iordaniya tomonidan rejalashtirish va xalqaro taraqqiyot, sanoat va savdo, raqamli iqtisodiyot va startaplar vazirliklari, parlament, shuningdek, Iordaniya va Ammon shahri savdo-sanoat palatalarining mas’ul vakillari ishtirok etdi”, — deyiladi TIV axborotida.

Muzokaralar vaqtida o‘zaro savdo, investitsiya hajmini kengaytirish, O‘zbekiston—Iordaniya sherikligining shartnoma-huquq asoslarini mustahkamlash istiqbollari yuzasidan fikr almashilgan. Tomonlar ikki mamlakat savdo-sanoat palatalari o‘rtasida amaliy hamkorlik o‘rnatish va Ishbilarmonlar kengashini tuzish bo‘yicha takliflarni ko‘rib chiqqan.

“Muzokaralarda turistik va madaniy-gumanitar almashinuv masalalari ham ko‘rib chiqildi”, — deyiladi Tashqi ishlar vazirligi axborotida.