Иордания пойтахти Аммонда 17 сентябрь, сешанба куни Ўзбекистон ва Иордания ташқи сиёсат идоралари ўртасида илк маротаба сиёсий маслаҳатлашувлар бўлиб ўтди, дея хабар бермоқда Ўзбекистон Ташқи ишлар вазирлиги матбуот хизмати. Маслаҳатлашувлар вақтида Ўзбекистон делегациясига ташқи ишлар вазири ўринбосари Дилшод Аҳатов, Иордания томонига эса ташқи ишлар ва муҳожирлар масалалари бўйича вазирлик бош котиби Сажа ал-Мажалий бошчилик қилган.
«Сиёсий маслаҳатлашувларда Иордания томонидан режалаштириш ва халқаро тараққиёт, саноат ва савдо, рақамли иқтисодиёт ва стартаплар вазирликлари, парламент, шунингдек, Иордания ва Аммон шаҳри савдо-саноат палаталарининг масъул вакиллари иштирок этди», — дейилади ТИВ ахборотида.
Музокаралар вақтида ўзаро савдо, инвестиция ҳажмини кенгайтириш, Ўзбекистон—Иордания шериклигининг шартнома-ҳуқуқ асосларини мустаҳкамлаш истиқболлари юзасидан фикр алмашилган. Томонлар икки мамлакат савдо-саноат палаталари ўртасида амалий ҳамкорлик ўрнатиш ва Ишбилармонлар кенгашини тузиш бўйича таклифларни кўриб чиққан.
«Музокараларда туристик ва маданий-гуманитар алмашинув масалалари ҳам кўриб чиқилди», — дейилади Ташқи ишлар вазирлиги ахборотида.
Изоҳ (0)