2018 йилнинг 29 ноябрь куни Бухоро туманидаги «Шейхон» МФЙ Дехчабеги қишлоғи ҳудудидан оқиб ўтувчи «Сатторобод» ариғидан 20 яшар йигитнинг мурдаси топилган эди. 2019 йил 21 июнда Бухоро вилояти суди томонидан қотилликни содир этган фуқарога нисбатан Ўзбекистон Республикаси Жиноят Кодексининг 97-моддаси (қасддан одам ўлдириш) 1-қисми қўлланилган. Бу ҳақда «Дарё»га вилоят суди судьяси Завқий Қурбонов маълум қилди.
Ҳолатга кўра, Бухоро туманида яшовчи 1999 йилда туғилган марҳум Шаҳзод Саломов Бухоро шаҳрида туғилган тенгдоши Аслонбек Усмонов билан олдиндан таниш бўлган.
Аслонбек Усмонов ўзи ёқтирган қиз 2000 йилда туғилган қиз Наимова Камола (қизнинг исми шарифи ўзгартирилган)нинг Шаҳзод Саломовда кўнгли борлигидан хабар топган ва рашк оқибатида Шаҳзодни ўлдириш пайига тушган.
Шу мақсадда Аслонбек Шаҳзодни Бухоро шаҳридаги «Роҳат» автобекатига чақирган. Икки йигит Шаҳзод Саломовга тегишли Matiz русумли давлат белгиси 80 Р 308 ВА рақамли автомашина салонида қаттиқ жанжаллашиб қолган.
Аслонбек Усмонов ўзи билан бирга олиб келган ошхона пичоғи билан Шаҳзод Саломовнинг кўкрак қафаси олди ва юзасига 2 марта, чап елка камари соҳасига 2 марта ва чап қўлтиқости соҳасига 1 маротаба уриб, жароҳат етказиб, қасддан одам ўлдириш жиноятини содир этган.
Аслонбек Усмонов ўз жиноятини яшириш мақсадида Шаҳзод Саломовнинг шахсий машинасидан фойдаланиб, унинг мурдасини Бухоро туманидаги «Сатторобод» ариғига ташлаган. Унга тегишли автомашинани эса Дўлама қишлоғи ҳудудидан ўтувчи автомобиль йўли ёқасига қулфланган ҳолатда ташлаб кетган.
Аслонбек қотиллик жиноятини содир этиб, жасадни «ғойиб» қилиб қайтаётган чоғида воқеликка аввалдан унинг таниши бўлган 1998 йилда туғилган Жаҳонгир Жабборов гувоҳ бўлган. Шаҳзоднинг қасддан ўлдирганлиги билан боғлиқ бўлган барча ҳолатларни батафсил равишда яққол билган ва мурдани ўз кўзи билан кўрган. Қотиллик ўта оғир жиноятлар туркумига киришини била туриб, дўсти Аслонбекни унинг ҳам ҳаётига зарар етказиши мумкинлигидан қаттиқ қўрққан. Шу сабабли, Аслонбек олдида ўзини ҳеч нарсани кўрмагандек тутишга мажбур бўлган. Ва бу ҳақда эса ҳуқуқни муҳофаза қилувчи органларга хабар бермаган.
2018 йил 30 ноябрь Бухоро тумани ИИБ вакилларининг тезкор саъй-ҳаракатлар натижасида содир этилган жиноят аниқланган. Шундан сўнггина Жаҳонгир дўсти Аслонбек томонидан содир этилган қотиллик жинояти ҳақида иқрорлик кўрсатувини берган.
Эндигина 20 ёшда бўлган фуқаро Аслонбек Усмонов томонидан содир этилган қотиллик сабаблари ўрганилган. Унга нисбатан Ўзбекистон Республикаси Жиноят Кодексининг 97-моддасининг 1-қисми қўлланилган ва 13 йилга озодликдан маҳрум қилинган.
Қотиллик жиноятини қасддан яширган Жаҳонгир Жабборовга Жиноят Кодексининг 241-моддасининг 2-қисмида назарда тутилган жиноятни содир этганликда айбли деб топилиб, 4 йил озодликни чеклаш жазоси тайинланган.
Изоҳ (0)