“Noshirlik faoliyati to‘g‘risida”gi qonun loyihasida kitobxonlik madaniyatidagi bo‘shliqlarni to‘ldirishga e’tibor qaratilmoqda

“Noshirlik faoliyati to‘g‘risida”gi qonun loyihasida milliy matbaa noshirligida paydo bo‘lgan bo‘shliqlarni to‘ldirish orqali milliy axborot maydonini yaratishga alohida e’tibor qaratiladi. Bu haqda Axborot va ommaviy kommunikatsiyalar agentligi matbuot xizmati “Daryo”ga ma’lum qildi.

Ta’kidlanishicha, “Noshirlik faoliyati to‘g‘risida”gi qonun loyihasi Oliy Majlis Qonunchilik palatasi Innovatsion rivojlanish, axborot siyosati va axborot texnologiyalari masalalalari qo‘mitasi tomonidan ikkinchi o‘qish muhokamasi uchun tayyorlanmoqda. Qonun loyiha ustida ishlayotgan ishchi guruh milliy matbaa noshirligi hamda kitobxonlik madaniyatini oshirishdagi paydo bo‘lgan bo‘shliqlarni to‘ldirish orqali milliy axborot maydonini yaratishni o‘z oldiga maqsad qilib qo‘ygan.

Vazirlar Mahkamasi tomonidan kiritilgan ushbu qonun loyihasi noshirlik faoliyatining ko‘plab yo‘nalishlarini ko‘zda tutgan holda, madaniy, ilmiy, ma’rifiy ehtiyojlarini hisobga olib ishlab chiqilgan. Unda yangi texnologiyalarni joriy etish yo‘li bilan nashriyot-matbaa majmuasining moddiy-texnika bazasini mustahkamlash, chet el investitsiyalarni jalb etish hamda mahalliy noshirlik mahsulotini O‘zbekistonda va xorijda tarqatish tarmog‘ini tashkil etishning huquqiy asoslarini yaratishga e’tibor qaratilmoqda.

Qonunchilik palatasining yalpi majlisida 2019-yilning 6-sentabr kuni birinchi o‘qishdan muhokamadan o‘tgan mazkur qonun loyihasi 1996-yil 30-avgustda qabul qilingan “Noshirlik faoliyati to‘g‘risida”gi qonundan nafaqat noshirlarning balki kitobxonlik madaniyatini shakllantirishga alohida e’tibor qaratilayotgani bilan tubdan farq qiladi.

Mazkur qonun loyihasi qabul qilinishi kitobxonlikni targ‘ib qilish va ijtimoiy ahamiyatga molik zarur adabiyotlardan foydalanish, kitobxonlik madaniyatini rivojlantirishga ko‘maklashish uchun zarur huquqiy asoslar yaratiladi.

Qonun loyihasi qonunchilik palatasining rasmiy veb-sahifasida jamoatchilik muhokamasi uchun joylashtirilgan. Parlamentning profil qo‘mitasi ekspert va keng jamoatchilik takliflarini olishda manfaatdorligini ma’lum qiladi.