24—25-avgust kunlari futbol bo‘yicha Italiya A Seriyasining 1-turi doirasida 3 ta uchrashuv yakunlandi.
Foto: Twitter/@acmilan
Turni “Parma”—“Yuventus” o‘yini ochib berdi.
Bellashuvdagi yagona gol 21-daqiqada urildi. Unga “keksa sinyora” himoyachisi Jorjo Kyellini mualliflik qildi.
Shu tariqa Turin klubi mavsumni g‘alaba bilan boshladi va dastlabki 3 ochkoga ega bo‘ldi.
Shu kuni Karlo Anchelotti boshliq “Napoli” “Fiorentina” maydoniga safar qildi.
Uchrashuv davomida mezbon jamoa a’zolari Erik Pulgar (9—penalti), Nikola Milenkovich (51) hamda Kevin-Prins Boateng (65) bittadan golni o‘z hisobiga yozdirib qo‘ydi. Neapolliklardan Lorenso Insinye (42—penalti, 67) dublga erishgan bo‘lsa, Dris Mertens (38), va Xose Kalyexon (56) bir martadan raqib darvozasini ishg‘ol qildi.
Shu tariqa o‘yin 4:3 hisobida “Napoli” foydasiga yakunlandi.
25-avgust, yakshanba kuni Marko Jampaolo boshqaruviga o‘tgan “Milan” jamoasi mehmonda “Udineze” bilan bahsga kirishdi.
Uchrashuvning 72-daqiqasida “Udineze” himoyachisi Rodrigo Bekao Janluiji Donnarumma qo‘riqlayotgan darvozani ishg‘ol qildi (1:0).
Bellashuv yakuniga ko‘ra, “Milan” mavsumni mag‘lubiyat bilan boshladi.
A Seriya
1-tur bahslari
24-avgust, shanba
“Parma”—“Yuventus” 0:1
Gol: 0:1 — 21 Kyellini
“Fiorentina”—“Napoli” 3:4
Gollar: 1:0 — 9, penalti, Pulgar, 1:1 — 38 Mertens, 1:2 — 42, penalti, Insinye, 2:2 — 51 Milenkovich, 2:3 — 56 Kalyexon, 3:3 — 65 Boateng, 3:4 — 67 Insinye
25-avgust, yakshanba
“Udineze”—“Milan” 1:0
Gol: 1:0 — 72 Rodrigo Bekao
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
