Omadsiz Gvardiola va “Chelsi”, qaytayotgan “Arsenal” va to‘xtamayotgan “Liverpul”. APLning tur tafsilotlari

Futbol muxlislari 17—20-avgust kunlari futbol bo‘yicha Angliya Premyer ligasining 2-tur bahslariga guvoh bo‘ldi. Biz esa an’anaga muvofiq qiziqarli va kurashlarga boy bo‘lgan tur tafsilotlari bilan bo‘lishamiz.

“Arsenal”—“Byornli”

Mazkur turni Unai Emeri qo‘l ostidagi “Arsenal” klubi Londondagi “Emireyts” stadionida “Byornli”ga qarshi bahs bilan ochib berdi. Ikkala jamoa ham o‘yinga ko‘tarinki kayfiyatda yetib kelgandi. Xususan, mehmonlar ilk turda “Sauthempton”ni 3:0 hisobida taslim qilgan bo‘lsa, “Arsenal” esa safarda “Nyukasl”ni Pyer-Emerik Obameyangning yagona goli evaziga mag‘lub etgandi. O‘yin avvalida “Real”dan ijaraga olingan Dani Sebalyosning uzatmasini fransiyalik Aleksandr Lyakazett mehmonlar posboni Nik Poup darvozasiga joylab qo‘ygan bo‘lsa, 43-daqiqada “Byornli” to‘purari Eshli Barns London klubi darvozasini ishg‘ol etishning uddasidan chiqdi. Ikkinchi bo‘limning 64-daqiqasiga kelib yana o‘sha tinib-tinchimas Sebalyosning navbatdagi uzatmasini “to‘pchilar” goleadori Pyer-Emerik Obameyang golga aylantira oldi. O‘yinning qolgan qismida esa tomonlar boshqa gol ura olmadi. Natijada “Arsenal” 2009/10-yilgi mavsumdan beri ilk marta Premyer ligada mavsumni ketma-ket 2 ta g‘alaba bilan boshladi.

“Sauthempton”—“Liverpul”

Ilk turda “Norvich”ni mag‘lub etgan Yurgen Klopp shogirdlari bu safar mehmonda “Sauthempton” mehmoni bo‘ldi. Tomonlar o‘yinni juda ehtiyotkor boshlashi sabab ham muxlislar birinchi golni faqatgina 46-daqiqaga kelibgina guvohi bo‘ldi. Jeyms Milnerning uzatmasidan so‘ng bir nechta raqibini chalg‘ita olgan Sadio Mane chiroyli gol sohibiga aylandi. 71-daqiqaga kelib Manening sa’y-harakatlari evaziga himoyachilarni ortda qoldirgan Roberto Firmino “qizillar”ning o‘yindagi so‘nggi golini urdi. Uchrashuvga yakuniy nuqtani esa o‘z vaqtida “Liverpul”da to‘p surgan Denni Ingz qo‘ydi. Denni mersisaydliklar darvozaboni Adrianning qo‘pol xatosini kechirib o‘tirmadi. Shu tariqa “Liverpul” mavsumdagi ikkinchi g‘alabasiga erishdi.

“Manchester Siti”—“Tottenhem”

Turning so‘zsiz markaziy o‘yini Manchesterdagi “Ittihod” stadionida bo‘lib o‘tdi. Unda so‘nggi vaqtlar bir-biriga ko‘p bora duch kelib, azaliy raqibga aylanib qolgan “Manchester Siti” hamda “Tottenhem” o‘zaro to‘qnash keldi.

Uchrashuvda hisobni 20-daqiqada o‘tgan turda het-trikka erishgan Rahim Sterling ochdi. Oradan uch daqiqa o‘tib argentinalik Erik Lamela muvozanatni tikladi. 35-daqiqada esa boshqa bir argentinalik Serxio Aguero mezbonlarni hisobda oldinga olib chiqdi. Qayd etish joiz, “Siti”ning ikkala goliga ham Kevin de Bryuyne o‘zining qoyilmaqom uzatmalari bilan hammualliflik qildi. Ikkinchi bo‘lim esa birinchisidan ham qiziqarliroq o‘tdi. Zaxiradan maydonga tushganiga 1 daqiqa ham bo‘lmagan Lukas Moura vatandoshi Ederson qo‘riqlayotgan darvozani boshi bilan ishg‘ol qildi. 92-daqiqada Gabi Jezus “shporlar” darvozasini ishg‘ol qildi. Biroq hakam VAR’ga tayangan holda “Siti”ning golini bekor qildi. O‘tgan mavsum “Manchester Siti” Chempionlar Ligasidan xuddi shu tarzda chiqib ketgandi. O‘shanda ham raqib “Tottenhem” edi.

“Chelsi”—“Lester”

O‘tgan turda “Manchester Yunayted”dan qattiq “tarsaki”ni qabul qilib olgan Frenk Lempard boshqaruvidagi “Chelsi” 2-turda “Lester”ni o‘z maydonida qabul qildi. O‘yin “aristokratlar” uchun omadli boshlandi. Meyson Maunt “tulkilar” yarim himoyachisi Uilfred Ndidining xatosidan unumli foydalanib, Kasper Shmeyxel darvozasini ishg‘ol qildi. Birinchi bo‘lim shu tarzda yakunlandi. 67-daqiqada esa birinchi bo‘limdagi xatosidan to‘g‘ri xulosa chiqara olgan Ndidi jamoasining hisobni tenglashtiruvchi goliga mualliflik qildi. Natijada tomonlar durangga imzo chekdi.

“Vulverhempton”—“Manchester Yunayted”

Turning so‘nggi o‘yinida “Manchester Yunayted” safarda “bo‘rilar” mehmoni bo‘ldi. 27-daqiqada Markus Reshfordning uzatmasini Antoni Marsial qoyilmaqom tarzda portugaliyalik posbon Rui Partisiu darvozasiga joylab qo‘ydi. Ikkinchi bo‘liming 55-daqiqasida esa Ruben Nevesh David de Xea darvozasini jarima maydoni tashqarisidan o‘qqa tutdi va juda chiroyli golga mualliflik qildi. 68-daqiqada Pol Pogba o‘zi ishlagan 11 metrlik jarima zarbasini golga aylantira olmadi. Natijada “qizil iblislar” ikkinchi turga keliboq ochko yo‘qotdi.

Tur raqamlarda

•  1. 25 ta gol urildi
• 2. Ikkita 1:0, uchta 2:1, bitta 3:1, uchta 1:1 hisoblari qayd etildi.
• 3. Faqat bitta o‘yin 2:2 hisobi bilan tugadi.
• 4. Bitta o‘yinda eng ko‘p 4 ta gol urildi.
• 5. Birinchi bo‘limda umumiy 17 ta, ikkinchi bo‘limda esa 8 ta gol urildi.
• 6. Faqat bitta o‘yinda het-trik qayd etildi.
• 7. Faqat ikkita o‘yinda mehmonlar g‘alaba qozondi. Ikkala o‘yinda ham 1:2 hisobida.
• 8. To‘rtta o‘yinda mezbonlar g‘alaba qozondi. Yana to‘rtta o‘yin esa durang bilan yakunlandi.

Musobaqa jadvali

To‘purarlar ro‘yxati

1. Rahim Sterling (“Manchester Siti”) — 4 ta gol
2. Tyeyemu Pukki (“Norvich”) — 4 ta gol
3. Eshli Barns (“Byornli”) — 3 ta gol