Qashqadaryo viloyatining G‘uzor tumanidagi “Gulshan” mahalla fuqarolar yig‘ini aholisi Qashqadaryodagi gaz idorasi mas’ullarining boqi-beg‘amligidan norozi. Bu haqda “Daryo”ga O‘zLiDeP Qashqadaryo viloyati kengashi matbuot xizmati ma’lum qilmoqda.
Partiya matbuot xizmatining xabariga ko‘ra, O‘zLiDeP Qashqadaryo viloyati kengashi deputatlari G‘uzor tumanidagi “Gulshan” mahalla fuqarolar yig‘ini aholisi bilan muloqot o‘tkazganda, aholi hududda o‘g‘rincha gaz ishlatuvchilar bisyor ekanligini, bu borda mas’ul tashkilot rahbarlariga bir necha bor murojaat qilishsa-da, hech qanday natija bo‘lmayotganligidan shikoyat qilgan.
— Uchrashuv davomida fuqarolar tomonidan 20 ga yaqin turli mazmundagi murojaatlar kelib tushdi. Murojaatlarning aksariyat qismi joyida hal etildi, qolganlari bo‘yicha mutasaddilarga ko‘rsatma va topshiriqlar berildi, — deyiladi partiya matbuot xizmati xabarnomasida.
Ma’lum qilinishicha, “Gulshan” MFY ilgari “Yakkadaraxt”, “Eskibog‘”, “Yonqishloq”, “Chaqar” MFYlariga bo‘lingan. Mazkur hududlarda 45 ming aholi istiqomat qilgan. E’tiborlisi, ko‘p mahallalar gazdan benasib qolayotgan bir vaqtda, hudud ahliga gaz doimiy tarzda ajratib berilgan. Ammo mahallada gaz sarfi juda tartibsiz.
— Sakson yildan buyon shu mahallada yashayman. Bundan yigirma yil avval mahalladoshlar bilan kengashib, gaz quvurlarini hashar yo‘li bilan tortib kelgan edik. Bugunga kelib, har kim o‘zboshimchalik bilan gaz quvuri tortib ketaverdi, mutasaddilardan hech biri “nima qilyapsan?” demadi. Eng achinarlisi, o‘g‘rincha gazni tortib borganlar, nojo‘ya maqsadlarda ham gazdan foydalanib yotibdi-ku, “schyotchik” qo‘yib, qonuniy foydalanadiganga gaz yo‘q. Ustiga-ustak yo‘q gaz uchun pul to‘laymiz. Gaz idorasi mas’ullariga tartibga olib beringlar, davlat bundan qancha zarar ko‘ryapti” deya murojaat qildik, lekin bizni eshitishmadi, — dedi eskibog‘lik Ergash bobo.
Ta’kidlash kerak, qachonki, mutasaddilar aholi murojaatini eshitsa, shundagina xalq bilan davlat tashkilotlari o‘rtasida ishonch hosil bo‘ladi. “Qashqadaryo gaz ta’minot” hududiy filiali mutasaddilari esa fuqarolarning haqli e’tirozlarini inobatga ham olmagan. Aholining aytishicha, bu e’tiborsizlik ayrim shaxslar uchun qo‘l kelib, gazdan noqonuniy foydalanilishi evaziga, qanchadan qancha tabiiy boylik nojo‘ya sarf etilmoqda.
— Yurtboshimiz tomonidan amalga oshirilayotgan islohotlarni ko‘rib, shu kunlarga yetkazganiga shukrona keltiramiz, — deydi “Chaqar” mahallasida yashovchi Abduqahhor Tangriyev. — Doim qo‘limiz duoda, boisi qish oylarida chiroqsiz juda qiynalgan kunlarimiz ham bo‘lgan. Ilgari kuniga atigi uch soat chiroq berilar edi. Yaratganga shukr, hozir chiroq muammo bo‘lmay qoldi. Shu bois, muammolarni hal etsa bo‘lar ekan deb, jamoat muammolari yuzasidan tegishli tashkilotlarga murojaat qildik. Lekin mutasaddilar “bajaramiz, qilamiz” deyishdan nariga o‘tmaydi.
Izoh (0)