Қашқадарё вилоятининг Ғузор туманидаги «Гулшан» маҳалла фуқаролар йиғини аҳолиси Қашқадарёдаги газ идораси масъулларининг боқи-беғамлигидан норози. Бу ҳақда «Дарё»га ЎзЛиДеП Қашқадарё вилояти кенгаши матбуот хизмати маълум қилмоқда.
Партия матбуот хизматининг хабарига кўра, ЎзЛиДеП Қашқадарё вилояти кенгаши депутатлари Ғузор туманидаги «Гулшан» маҳалла фуқаролар йиғини аҳолиси билан мулоқот ўтказганда, аҳоли ҳудудда ўғринча газ ишлатувчилар бисёр эканлигини, бу борда масъул ташкилот раҳбарларига бир неча бор мурожаат қилишса-да, ҳеч қандай натижа бўлмаётганлигидан шикоят қилган.
— Учрашув давомида фуқаролар томонидан 20 га яқин турли мазмундаги мурожаатлар келиб тушди. Мурожаатларнинг аксарият қисми жойида ҳал этилди, қолганлари бўйича мутасаддиларга кўрсатма ва топшириқлар берилди, — дейилади партия матбуот хизмати хабарномасида.
Маълум қилинишича, «Гулшан» МФЙ илгари «Яккадарахт», «Эскибоғ», «Ёнқишлоқ», «Чақар» МФЙларига бўлинган. Мазкур ҳудудларда 45 минг аҳоли истиқомат қилган. Эътиборлиси, кўп маҳаллалар газдан бенасиб қолаётган бир вақтда, ҳудуд аҳлига газ доимий тарзда ажратиб берилган. Аммо маҳаллада газ сарфи жуда тартибсиз.
— Саксон йилдан буён шу маҳаллада яшайман. Бундан йигирма йил аввал маҳалладошлар билан кенгашиб, газ қувурларини ҳашар йўли билан тортиб келган эдик. Бугунга келиб, ҳар ким ўзбошимчалик билан газ қувури тортиб кетаверди, мутасаддилардан ҳеч бири «нима қиляпсан?» демади. Энг ачинарлиси, ўғринча газни тортиб борганлар, ножўя мақсадларда ҳам газдан фойдаланиб ётибди-ку, «счётчик» қўйиб, қонуний фойдаланадиганга газ йўқ. Устига-устак йўқ газ учун пул тўлаймиз. Газ идораси масъулларига тартибга олиб беринглар, давлат бундан қанча зарар кўряпти» дея мурожаат қилдик, лекин бизни эшитишмади, — деди эскибоғлик Эргаш бобо.
Таъкидлаш керак, қачонки, мутасаддилар аҳоли мурожаатини эшица, шундагина халқ билан давлат ташкилотлари ўртасида ишонч ҳосил бўлади. «Қашқадарё газ таъминот» ҳудудий филиали мутасаддилари эса фуқароларнинг ҳақли эътирозларини инобатга ҳам олмаган. Аҳолининг айтишича, бу эътиборсизлик айрим шахслар учун қўл келиб, газдан ноқонуний фойдаланилиши эвазига, қанчадан қанча табиий бойлик ножўя сарф этилмоқда.
— Юртбошимиз томонидан амалга оширилаётган ислоҳотларни кўриб, шу кунларга етказганига шукрона келтирамиз, — дейди «Чақар» маҳалласида яшовчи Абдуқаҳҳор Тангриев. — Доим қўлимиз дуода, боиси қиш ойларида чироқсиз жуда қийналган кунларимиз ҳам бўлган. Илгари кунига атиги уч соат чироқ берилар эди. Яратганга шукр, ҳозир чироқ муаммо бўлмай қолди. Шу боис, муаммоларни ҳал этса бўлар экан деб, жамоат муаммолари юзасидан тегишли ташкилотларга мурожаат қилдик. Лекин мутасаддилар «бажарамиз, қиламиз» дейишдан нарига ўтмайди.
Изоҳ (0)