O‘zbekiston mudofaa vaziri Moskvada Shoygu bilan uchrashib, o‘zbekistonlik tankchilarni g‘alaba bilan qutladi

O‘zbekiston mudofaa vaziri general-mayor Bahodir Qurbonov armiya o‘yinlarining yopilish marosimida ishtirok etish uchun Rossiyaga tashrif buyurdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.

Joriy yil 3-avgustdan 17-avgust kuniga qadar davom etgan beshinchi xalqaro armiya o‘yinlarida O‘zbekiston Mudofaa vazirligi harbiy xizmatchilari munosib ishtirok etdi. Xususan, “Tank biatloni” musobaqasining 2-dvizionida ilk bor qatnashgan vakillarimiz barcha raqiblarini ortda qoldirib, faxrli birinchi o‘rinni qo‘lga kiritdi. Mudofaa vaziri O‘zbekiston sharafini munosib himoya qilgan “Tank biatloni” jamoasi bilan uchrashib, ularni qizg‘in muborakbod etdi.

“Sizlarni nufuzli musobaqada yuksak marrani egallab, davlatimiz bayrog‘ini baland ko‘targaningiz bilan qutlayman! Sizlar haqiqiy vatanparvarlarsiz! O‘zbekning quch-qudrati, mahorati va hech kimdan kam emasligini yana bir bor isbotladingiz! Sizlar bilan butun O‘zbekiston faxrlanadi”, — deya ta’kidladi Bahodir Qurbonov.

Shundan so‘ng O‘zbekiston mudofaa vaziri Bahodir Qurbonov Rossiya mudofaa vaziri armiya generali Sergey Shoygu hamrohligida “Do‘stlik uyi”da tashkil etilgan, O‘zbekiston Respublikasi ko‘rgazmasi bilan tanishdi.

Xalqaro armiya o‘yinlarining yopilish marosimi “Tank biatloni” musobaqasining 1-divizion final bahsidan so‘ng, Moskva viloyatidagi “Patriot” parkida bo‘lib o‘tadi.