Ўзбекистон мудофаа вазири Москвада Шойгу билан учрашиб, ўзбекистонлик танкчиларни ғалаба билан қутлади

Ўзбекистон мудофаа вазири генерал майор Баҳодир Қурбонов армия ўйинларининг ёпилиш маросимида иштирок этиш учун Россияга ташриф буюрди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.

Жорий йил 3 августдан 17 август кунига қадар давом этган бешинчи халқаро армия ўйинларида Ўзбекистон Мудофаа вазирлиги ҳарбий хизматчилари муносиб иштирок этди. Хусусан, «Танк биатлони» мусобақасининг 2-двизионида илк бор қатнашган вакилларимиз барча рақибларини ортда қолдириб, фахрли биринчи ўринни қўлга киритди. Мудофаа вазири Ўзбекистон шарафини муносиб ҳимоя қилган «Танк биатлони» жамоаси билан учрашиб, уларни қизғин муборакбод этди.

«Сизларни нуфузли мусобақада юксак маррани эгаллаб, давлатимиз байроғини баланд кўтарганингиз билан қутлайман! Сизлар ҳақиқий ватанпарварларсиз! Ўзбекнинг қуч-қудрати, маҳорати ва ҳеч кимдан кам эмаслигини яна бир бор исботладингиз! Сизлар билан бутун Ўзбекистон фахрланади», — дея таъкидлади Баҳодир Қурбонов.

Шундан сўнг Ўзбекистон мудофаа вазири Баҳодир Қурбонов Россия мудофаа вазири армия генерали Сергей Шойгу ҳамроҳлигида «Дўстлик уйи»да ташкил этилган, Ўзбекистон Республикаси кўргазмаси билан танишди.

Халқаро армия ўйинларининг ёпилиш маросими «Танк биатлони» мусобақасининг 1-дивизион финал баҳсидан сўнг, Москва вилоятидаги «Патриот» паркида бўлиб ўтади.