Buxoro shahrida ehtiyojmand oilalar, jismoniy imkoniyati cheklangan fuqarolar, shuningdek, san’at, madaniyat sohasi xodimlari va faol yoshlardan iborat 420 oilaga 10 ta 7 qavatli uydan xonadonlar topshirildi.
Ushbu uylar Prezidentning 2016-yil 22-noyabrdagi “2017—2020-yillarda shaharlarda arzon ko‘p kvartirali uy-joylar qurish va rekonstruksiya qilish dasturini amalga oshirishga doir chora-tadbirlar to‘g‘risida”gi qarori asosida bunyod etilgan.
“O‘zshaharqurilishinvest” injiniring kompaniyasi Buxoro viloyati bo‘yicha vakili Hayot Nizomovning ma’lum qilishicha, uy-joylar “Qurilishmegatrans”, “Prommontajstroy” singari qurilish-montaj korxonalari tomonidan bunyod etilgan.
Ularning qurilishiga 102,6 milliard so‘m sarflangan. Ushbu mablag‘ning 12 milliard so‘mdan ortig‘i xonadon sohiblarining dastlabki to‘lov badali va tijorat banklarining kredit mablag‘i hisobidan moliyalashtirilgan.