5-avgustning e’tiborga molik yangiliklari — “Daryo” dayjestida.

Shavkat Mirziyoyev 17 yillik faoliyati davomida birinchi marta mehnat ta’tiliga chiqdi.

Davlat rahbarining ta’tili O‘zbekiston hududida o‘tkazilishi rejalashtirilgan.

Prezidentning ta’tilga chiqishi O‘zbekiston tarixida birinchi marta emas, lekin avval ta’tilga chiqish rasman e’lon qilinganini eslash qiyin.

***

Shahnoza Mirziyoyeva Maktabgacha ta’lim vazirligi Maktabgacha ta’lim sohasi siyosatini shakllantirish va yuritish bosh boshqarmasi boshlig‘i etib tayinlandi.

U 2017-yilning dekabridan boshlab Maktabgacha ta’lim vazirligining Maktabgacha ta’lim muassasalari faoliyatini tashkil etish boshqarmasi boshlig‘i o‘rinbosari sifatida ishlab kelayotgan edi.

***

Tengrinews prezidentlar qanaqa poyabzal kiyishi tasvirlangan suratlar to‘plamini taqdim etdi.

Rossiya prezidentining bo‘yi pastligi sabab poshnasi yuqori oyoq kiyim kiyib yuradi. Jurnalistlar bu kabi “baland” poyabzallarni Rossiya bosh vaziri Dmitriy Medvedevda ham bir necha bor kuzatgan.

O‘zbekiston Prezidenti Shavkat Mirziyoyevning Z Zegna brendiga oid krossovkasi esa 317 dollar turadi. Hayit arafasida e’lon qilingan suratdan keyin uning narxi 500 dollarga chiqib ketgan.

***

Buxoro viloyat IIB matbuot xizmati xabariga ko‘ra, 4-avgust kuni soat 18:30 larda “Buxoro—Xorazm” (Olmaota—Nukus) yo‘nalishida harakatlanib borayotgan yo‘lovchi avtobus mudhish halokatga uchradi.

Oqibatda avtobusda 1 nafar yo‘lovchi voqea joyida vafot etgan, 2 nafar shaxs og‘ir va 8 nafar shaxs turli darajadagi tan jarohatlari olgan. Avtobusda bo‘lgan barcha yo‘lovchilarga birinchi tibbiy va psixologik yordam ko‘rsatilgan.

***

Turkmaniston prezidenti Gurbanguli Berdimuhamedov ta’tilni maroqli va faol tarzda o‘tkazmoqda.

Mamlakat rahbarining dam olayotgani tasvirlangan syujet bilan turkman televideniyesi bo‘lishdi.

Syujetda mamlakat rahbari erta tongda turib, velosipedda sayr qilayotgani, otxonasida axaltaka zotidagi otlarni minayotgani hamda Ashxoboddagi Olimpiada shaharchasida kuchishlatar tuzilmalarining rahbarlari bilan jismoniy mashg‘ulot bilan shug‘ullangani tasvirlangan.