Xorij internet saytlari, ijtimoiy tarmoqlarda “O‘zbekiston havo yo‘llari“ milliy aviakompaniyasi zamonaviy Boeing 787 Dreamliner samolyotlarini sotuvga qo‘yganligi haqida xabarlar tarqaldi. O‘zA keng muhokama qilinayotgan ushbu masalaga oydinlik kiritish maqsadida milliy aviakompaniya matbuot xizmati bilan bog‘landi.
“O‘zbekiston havo yo‘llari” milliy aviakompaniyasi (Uzbekistan Airways)dan ma’lum qilinishicha, MAK samolyotlar parkini unifikatsiyalash va takomillashtirish, ekspluatatsiya xarajatlarini kamaytirish, xizmat muddati 15 yildan ortiq bo‘lgan havo kemalarini realizatsiya qilishni rejalashtirgan.
Xususan, Il-76TD (5 dona) (chiqqan yili 1982—1992); Il-114-100 (7 dona) (chiqqan yili 1999—2013) va kompleks trenajyor KTS Il-114; Boeing - 757-200 (2 dona) (chiqqan yili 1999); Boeing - 767-3CBER (2 dona) (chiqqan yili 2003- 2004); Boeing - 767 VSF (2 dona) (chiqqan yili 1996) sotuvga qo‘yilgan.
Qayd etish kerak, samolyotlar flotini to‘xtovsiz yangilash zarurati xalqaro tajriba hisoblanadi. Jahonning yetakchi aviakompaniyalari samolyotlardan o‘rtacha 15—20 yil foydalanadi. Bu esa, yo‘lovchilar tomonidan aviakompaniyalar xizmatlarini tanlash, parvozlarning xavfsiz va muntazamligini ta’minlash va texnik xizmat ko‘rsatish bo‘yicha xarajatlarni kamaytirishga ijobiy ta’sir ko‘rsatadi.
“Ijtimoiy tarmoqlardagi bo‘layotgan muhokamalarning uch muhim jihati quyidagilar:
1) Yuqorida keltirilgan ro‘yxatga tushmagan, Boeing 787 Dreamliner samolyotlarini sotish joriy rejaga kirmagan;
2) Manbada ko‘rsatilgan va ijtimoiy tarmoqlarda muhokama qilinayotgan samolyotlarning narxi ham haqiqatga mos kelmaydi. Shuni nazarda tutish kerakki, muayyan samolyot modelining narxi konfiguratsiyasiga qarab bir-biridan farq qilishi mumkin. Masalan, “O‘zbekiston havo yullari” MAK ekspluatatsiyasidagi Boeing 787 samolyotlarining narxi ancha past bo‘lib, 115 million AQSh dollaridan boshlanadi.
3) Hozirgi yangi, zamonaviy samolyotlar narxini e’tiborga oladigan bo‘lsak, yangi samolyotlarni sotib olish, asosan kredit mablag‘larini jalb qilish yoki lizing orqali amalga oshirilishi mumkin.
“Uzbekistan Airways aviakompaniyasi jahondagi boshqa istalgan aviakompaniya kabi, o‘z kredit majburiyatlariga ega. Hozirgi vaqtda kredit majburiyatlari bo‘yicha to‘lovlar aviakompaniyaning o‘z shaxsiy mablag‘lari hisobidan to‘la ravishda va o‘z vaqtida amalga oshirilayapti”, deyiladi MAK xabarida.
Izoh (0)