23 yoshli argentinalik bokschi jangdan so‘ng vafot etdi, u ham Maksim Dadashev bilan bir kunda ringga chiqqandi

25-iyul, payshanba kuni Buenos-Ayresda bo‘lib o‘tgan jangdan so‘ng yengil vazn toifasidagi bokschi Ugo Santilyan (19 ta g‘alaba, 6 ta mag‘lubiyat, 2 ta durang, 8 ta nokaut) 23 yoshida vafot etdi. Bu haqda ESPN xabar berdi.

Santilyan mazkur jangda 30 yoshli urugvaylik Eduardo Abreuga qarshi ringga ko‘tarilib, durang natija qayd etgandi. To‘rtinchi raundga keliboq Santilyanning yuzi tanib bo‘lmas darajada edi. Jangdan so‘ng u hushini yo‘qotdi va tezda kasalxonaga jo‘natildi.

“Kasalxonaga tushgan vaqtda Santilyanda buyrak yetishmovchiligi kuzatildi va u koma holatida edi. Tekshiruvlar natijasida unga miyaning ichki shishishi tashxisi qo‘yildi, u umuman hushiga kelmadi”, — dedi Hospital Agudos San Felipe shifoxonasi shifokori Gratsiella Olloko.

Ma’lumot uchun, Santilyan—Abreu jangi ham Dadashev—Matias jangi bilan bir kunda bo‘lib o‘tdi. Dadashev ham jangdan 3 kun o‘tib kasalxonada vafot etgandi. Unga ham miyaning ichki shishi tashxisi qo‘yilgandi.