Samarqand viloyati hokimi Erkinjon Turdimov Toyloq tumanida bo‘lib o‘tgan sayyor qabulida sud qaroridan norozi bo‘lgan fuqaroga sud faoliyatiga aralashishga haqqi yo‘qligini bildirdi.
Barcha sayyor qabullarda viloyatdagi ijro hokimiyati bilan birga huquq-tartibot organlari rahbarlari — prokuror, IIB, adliya boshqarmasi boshliqlari, sudlar raislari ham ishtirok etmoqda. Ijro hokimiyati idoralariga vakolatiga kirmaydigan masalalarni tegishliligi bo‘yicha sudlardan yoki prokuratura organlaridan o‘rganib chiqish so‘ralmoqda.
Buni ayrim fuqarolar o‘z bilganicha talqin qilib, barcha masalani faqat Erkinjon Turdimovga bildirishga intilmoqda. Viloyat hokimining vaqtini o‘g‘irlayotgan, vakolatiga kirmaydigan masalada yordam so‘rayotgan murojaatchilarga aniq javob qaytarilyapti. Xususan, sudning qaroridan norozi bo‘lib kelgan fuqaroga aytilgan gap ko‘pgina shikoyatchilar uchun saboq bo‘ldi:
— O‘zbekistonda sudyalar mustaqil, faqat qonunga bo‘ysunadi. Sudyalarning odil sudlovni amalga oshirish borasidagi faoliyatiga biror bir tarzda aralashishga yo‘l qo‘yilmaydi va bunday aralashish qonunga muvofiq javobgarlikka sabab bo‘ladi. Shunga ko‘ra, viloyat hokimi bo‘lishimga qaramasdan qonundan tashqari ish yuritolmayman. Sud qaroridan norozi bo‘lsangiz, yuqori turuvchi sud idoralariga murojaat qiling.
Qariyb barcha boshqarma va idoralarda “navbatchi” murojaatchilardan biriga endi uning arizalari ko‘rib chiqilmasligi bildirildi. Otasini boqishga qurbi yetmayotgan murojaatchi bu xato fikr ekanligini qulog‘iga quyib oldi.
—Bizda voyaga yetgan farzandlar keksa ota-onalariga g‘amxo‘rlik qilishga majbur. Bu norma Konstitutsiya bilan mustahkamlab qo‘yilgan.
Izoh (0)