28-iyun kuni Telegram’dagi “Podslushano v Buxare” kanalida Buxoro shahrining 6-dahasida joylashgan yangi uylardan birida yong‘in chiqqani haqida xabar berilgandi.
Favqulodda vaziyatlar vazirligi Buxoro viloyat YoXB kuch vositalarini boshqarish markaziy guruhi boshlig‘i, kapitan Rustam Ro‘ziyevning “Daryo”ga ma’lum qilishicha, yong‘in aslida Buxoro shahridagi Turdi Farog‘iy ko‘chasidagi qarovsiz bo‘lgan chiqindi to‘plangan joyda sodir bo‘lgan. Yong‘in o‘z vaqtida va zudlik bilan bir necha daqiqalarda bartaraf etilgan.
— Chiqindilar yengil yonuvchi tashlandiq mahsulotlardan iborat bo‘lgani uchun olov gurkirab, tutun tarqatgan. Jarohat olganlar, yoki talofat ko‘rgan xonadonlar yo‘q, — dedi Rustam Ro‘ziyev.
Holat joyida borib o‘rganilganda, Turdi Farog‘iy ko‘chasida yangi turar joy binolari hamda maktabgacha ta’lim muassasasi barpo etilayotgani, yong‘in esa qurilish obyektini ajratib turuvchi tunuka to‘siqlar bilan o‘ralgan chiqindi to‘plangan joyda sodir bo‘lgani aniqlandi. Shahar markazidagi qarovsiz va obodonlashtirishga muhtoj manzilda “Shahzoda mebel”, “Fayz mebel”, “Muzaffar fayz” mebel ishlab chiqarish korxonalari hamda “Proform plus” sport klubi joylashgan. Ma’lumotlarga ko‘ra, hududning pana va qarovsiz manzilida joylashgan chiqindixona yonida “Muzaffar fayz” mebel ishlab chiqarish korxonasidan chiqqan qurilish chiqindilari o‘zboshimchalik bilan to‘plab borilgan.
— “Istiqlol” mahallamizda 22 ta ko‘p qavatli uy mavjud bo‘lib, 4062 nafar aholi yashaydi. Qurilishi bitkazilmagan uylar ham 20 ga yaqin. Biroq 2 ta chiqindixona bor. Shulardan biri hududdagi “Muzaffar Fayz” mas’uliyati cheklangan jamiyatning shundoq ortida. Rahbariyatiga bir necha bor murojaat etishimizga qaramay, chiqindilar axlat qutilarga emas, uning shundoq yaqinida o‘zboshimchalik bilan to‘plab borilgan. “Korxona chiqindilariyu maishiy chiqindilar o‘zlaringizniki, yig‘ishtirib olinglar, uning yoqimsiz hidi uygacha kiradi” deya ko‘p bor bildirganmiz, — dedi Turdi Farog‘iy ko‘chasi, 73-uyda yashovchi fuqaro Muattar Yo‘ldosheva.
Shuncha chiqindilar to‘planib, aholiga nohushlik kayfiyatini uyg‘otar ekan, nega “Maxsus avtoxo‘jalik” mas’uliyati cheklangan jamiyati e’tiborsiz, degan savol tug‘ildi.
Ma’lum bo‘lishicha, “Muzaffar Fayz” mas’uliyati cheklangan jamiyati, aslida “Maxsus avtoxo‘jalik”ga qarashli ekan. “Daryo” muxbiri savollariga Buxoro shahridagi “Maxsus avtoxo‘jalik” mas’uliyati cheklangan jamiyati rahbari Alisher Nazarov chiqindilar mebel ishlab chiqaruvchilariga tegishli bo‘lmaganini aytdi.
— U yerdagi chiqindi “Muzaffar Fayz”ga tegishli bo‘lmagan. Shaharda kesilgan daraxt shox-shabbalari edi. “Maxsus avtoxo‘jalik” hisobida 150 ta mashina bor. Vazirlar Mahkamasining 787-sonli qaroriga ko‘ra, “Maxsus avtoxo‘jalik” avtomashinalari faqatgina maishiy chiqindilarni oladi. Qurilish mollari yoki hashaklarni shartnoma asosida olamiz. Ushbu bo‘yicha qarorda to‘liq yozib qo‘yilgan. Savolingiz bo‘lsa, xat bilan chiqing. Holatga oid suratlar bor. Qo‘l telefonim oddiy. Surat kerak bo‘lsa, yozma ravishda bildiring, — deydi Alisher Nazarov.
28-iyun kuni tungi soat 00:20 larda yong‘in, aynan, chiqindixonada emas, uning yonida o‘zboshimchalik bilan uyumlab kelingan joyda sodir bo‘lgan.
— “Maxsus avtoxo‘jalik” rahbari noto‘g‘ri gapirgan. Aynan shu manzilda “Muzaffar Fayz”ga tegishli chiqindilar axlat uyumiga aylanib, to‘planib qolgan. U manzilda hech qanday daraxt yo‘q. Demak, shox-shabbalar ham. Axlat uyumi qurilish materiallari chiqindilaridan iborat bo‘lgan. Biz shaxsan Alisher Nazarovning o‘zini “Muzaffar Fayz” mas’uliyati cheklangan jamiyati chiqindilari shundoq chiqindixona yonida to‘planib borayotgani, bu aholiga nohushlik tug‘dirib, atrof-muhitning ham yanada noobodligini ta’minlashga ta’sir ko‘rsatayotgani haqida ko‘p bor bildirganmiz. Hatto “Chorasini ko‘rmasangiz, yuqori tashkilotga murojaat etishga majbur bo‘lamiz”, deganmiz. Necha marotaba ogohlantirilishiga qaramay, tozalashmaydi, e’tibor qaratishmaydi, — 47-sonli “Istiqlol” mahalla fuqarolar yig‘ini raisi Zebo Zohidova.
Hudud profilaktika inspektori ham mahalla raisi fikrini tasdiqlab, aynan mahalladagi shu hudud og‘riqli nuqta ekanligini ta’kidladi.
Chiqindixona pana joyda bo‘lgani uchun axlat qutilaridan ham axlatlar o‘z vaqtida olinmagan. Atrof-muhitning yanada ifloslanishiga ta’sir ko‘rsatgan. Shuningdek, qurilish ishlari davom etayotgani uchun hudud ancha-muncha obodonlashtirishga muhtoj. Achinarli ahvolda.
Izoh (0)