Vahshiylarcha o‘ldirilgan TATU talabasi, 5 ta viloyatdagi sel xavfi, Rossiyada yonib ketgan atom suvosti kemasi va kunning boshqa xabarlari

2-iyulning e’tiborga molik yangiliklari — “Daryo” dayjestida.

TATU talabasi yozgi ta’til davrida o‘z uyida vahshiylarcha o‘ldirib ketildi.

Muhammad al-Xorazmiy nomidagi Toshkent axborot texnologiyalari universiteti Kompyuter injiringi fakulteti ikkinchi bosqich talabasi A.Sh. 28-iyun tonggi soat 3:45 larda noma’lum ikki fuqoro tomonidan o‘z xonodonida vahshiylarcha pichoqlanib ketilgan. Natijada A.Sh. voqea joyida vafot etgan.

***

FVV 3-iyul kuni Toshkent, Jizzax, Andijon, Namangan va Farg‘ona viloyatlarining tog‘ va tog‘oldi hududlarida sel kelishi xavfi mavjudligini ma’lum qildi.

Vazirlik ehtiyot choralarini ko‘rishga, hamda avariya va boshqa noxush holatlar vujudga kelganda, FVVning 10-50  raqamiga murojaat etishga da’vat qildi.

***

Rossiya harbiy-dengiz flotining 14 nafar suvosti dengizchilari ilmiy-tadqiqot chuqur suvosti apparatida yuz bergan yong‘in oqibatida halok bo‘ldi.

Keyinroq 14 nafar suvosti dengizchilari yong‘in oqibatida halok bo‘lgan Rossiya apparati “Losharik” sifatida ma’lum bo‘lgan AS-12 atom chuqur suvosti kemasi ekanligi xabar qilindi.

***

Buxoroga ziyoratga kelib, hovuzga cho‘kkan bolani milliy gvardiyachi qutqarib qoldi.

Ota-onasi qarovisiz qolgan bola “Bibi Orifa” masjidi hovlisida joylashgan hovuz bo‘yiga kelgan va oyog‘i sirpanib ketishi oqibatida hovuz ichki qismiga tushib ketgan.

***

Olmaliqda ikkita oltin koni ochiladi.

Olmaliq kon-metallurgiya kombinatida tarkibi oltinga boy rudalarni qazib olish bo‘yicha ikkita investitsiyaviy loyiha amalga oshirilmoqda.