Боку шаҳрида UNESCO Бутунжаҳон мероси қўмитаси 43-сессиясининг тантанали очилиш маросими бўлиб ўтди. Бу ҳақда Туризмни рвожлантириш қўмитаси матбуот хизмати хабар берди.
Унда Озарбайжоннинг биринчи вице-президенти, UNESCO кўнгилли элчиси Меҳрибон Алиева иштирок этди.
Шунингдек, UNESCO бош директори Одре Азуле, Ташкилотнинг Ижро кенгаши раиси Ли Бен Хён ва Озарбайжон Республикаси маданият вазири Абулфас Гараевлар ҳам сўзга чиқди.
Бутунжаҳон мероси қўмитаси 43-сессиясида Ўзбекистондан UNESCO ишлари бўйича Миллий комиссия раиси, бош вазир ўринбосари Азиз Абдуҳакимов бошчилигидаги делегация иштирок этмоқда.
Таъкидлаш жоизки, Бутунжаҳон мероси қўмитасининг 43-сессиясида дунёнинг 180 дан ортиқ мамлакатидан 2500 дан зиёд киши - вазирлар, UNESCO элчилари, тегишли ташкилотларнинг бош директорлари, халқаро тузилмаларнинг Озарбайжондаги элчилари ва мамлакат ҳукумати аъзолари қатнашмоқда.
Қўмитанинг Бокудаги сессиясида UNESCO рўйхатига киритиш учун 42 аризадан 36 тақдимот кўриб чиқилади.
Булардан 6 таклиф - табиий меросга, 28 таси - маданий меросга ва 2 таси аралаш (табиий ва маданий) меросга тааллуқли. Икки кунлик сессия доирасида Азиз Абдуҳакимов бошчилигидаги Ўзбекистон делегацияси вакиллари UNESCO бош директори Одре Озуле, Озарбойжон бош вазир ўринбосари Д.Аҳмедов, маданият вазири А.Гараев, таълим вазири Д.Байрамов, Туризмни ривожлантириш давлат агентлиги раиси Ф.Нагиев, UNESCO Бутунжаҳон мероси маркази директори М.Рёсслер ҳамда Бутунжаҳон мероси қўмитасига аъзо 21 мамлакат делегациялари раҳбарлари билан учрашувлар ўтказиши режалаштирилган.
Бугунги кунда Ўзбекистон ва UNESCO ўртасида кўп босқичли ва самарали ҳамкорлик амалга оширилмоқда. Хусусан, ўтган йилнинг октябрида Президент Шавкат Мирзиёевнинг UNESCO штаб-квартирасига ташрифи давомида имзоланган «Мамлакатлар дастури» доирасида маданият, таълим, илм-фан ва АКТ ривожи каби йўналишларга оид муҳим лойиҳалар амалга оширилмоқда.
Томонлар ўртасида Ўзбекистоннинг моддий ва номоддий маданий меросини асраш масалалари бўйича йўлга қўйилган конструктив мулоқотни алоҳида таъкидлаш жоиз, бу республика томонидан ратификация қилинган барча нормалар ҳамда UNESCO’нинг ушбу йўналишдаги тавсияларини тўлиқ таъминлаш имконини беради. Бундан ташқари, Азиз Абдуҳакимов «Ипак йўли» Халқаро туризм университети ректори сифатида Озарбайжон туризм ва менежмент университети билан таълим ва илм-фан бўйича Англашув меморандумини имзолаши кутилмоқда.
Изоҳ (0)