O‘zbekistonlik gimnastikachilar Osiyo chempionatida 13 ta medalni qo‘lga kiritdi

Tailandning Pattayya shahrida bo‘lib o‘tgan badiiy gimnastika bo‘yicha kattalar va o‘smirlar o‘rtasidagi Osiyo chempionatida O‘zbekiston terma jamoasi vakillari umumiy hisobda 13 ta medalga ega chiqdi. Bu haqda MOQ matbuot xizmati xabar berdi.

O‘zbekistonlik o‘smirlar xalqada, kattalar esa 3 ta xalqa va 2 ta bulavada o‘tkazilgan guruh mashqlarida eng yuqori ball bilan oltin medallarni qo‘lga kiritdi. Shuningdek, Taxmina Ikromova tasmada mashq qilish bo‘yicha ham birinchi o‘rinni egalladi. Aynan shu mashq bo‘yicha o‘tkazilgan guruh bahsida esa terma jamoa vakillariga ikkinchi o‘rin nasib etdi.

Shu tariqa, mazkur Osiyo chempionatida O‘zbekiston terma jamoasi 8 ta oltin, 4 ta kumush va 1 ta bronza medallarini jamg‘ardi.