O‘zbekiston futbol assotsiatsiyasi anjumanlar zalida 14-iyun, juma kuni navbatdan tashqari yig‘ilish bo‘lib o‘tdi.
Ma’lumotlarga ko‘ra, FIFA hakami, Jahon chempionatlari rekordchisi Ravshan Ermatov o‘z arizasiga ko‘ra ishdan ketgan Umid Ahmadjonov o‘rniga O‘zbekiston futbol assotsiatsiyasi vitse-prezidentiga aylandi.
Shuningdek, O‘FAning yana bir vitse-prezidenti sifatida ishlab kelgan Ichki ishlar vaziri Po‘lat Bobojonov o‘rniga uning vazirlikdagi o‘rinbosari Muhiddin Jo‘rayev mazkur lavozimni egalladi.
Ma’lumot uchun, Ravshan Ermatov 1977-yil 9-avgust kuni Toshkent shahrida tug‘ilgan. Futbolchi sifatida Toshkent viloyatining “G‘azalkent” klubida to‘p surgan. Og‘ir jarohat tufayli futbolchilik faoliyatiga yakun yasab, hakamlikka o‘tgan. 25 yoshida FIFA hakamiga aylangan.
U besh marta Osiyo qit’asining eng yaxshi hakami deb topilgan. “O‘zbekiston Iftixori” ko‘krak nishoni, “El-yurt hurmati” va “Buyuk xizmatlari uchun” ordenlari bilan taqdirlangan.
Ermatov Jahon chempionati final bosqichida eng ko‘p o‘yin boshqargan hakam hisoblanadi. U mundialda 11 ta o‘yinda bosh hakam bo‘lib ishlagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)