O‘zbekistondagi umumiy ovqatlanish korxonalari va dehqon bozorlarining sanitariya - epidemiologik holati talabga javob bermaydi. Bu haqda Senat raisi Nig‘matilla Yo‘ldoshev ma’lum qildi, deb xabar berdi “Daryo” muxbiri Sevara Nishonova.
“2017-yilda reja asosida oziq-ovqat ishlab chiqarish korxonalari, oziq-ovqat savdosi obyektlari va umumiy ovqatlanish korxonalarida o‘tkazilgan sanitariya nazorati davomida 587 ta tadbirkorlik subyektining barchasida sanitariya qoidalari, normalari va gigiyena normativlari qo‘pol buzilganligi aniqlangan. Bu jami tadbirkorlik subyektlarining bor-yo‘g‘i 1 foizidir.
Endi tasavvur qiling: Subyektlarning qolgan 99 foizida ham ahvol shunday bo‘lsa, aholining sanitariya-epidemiologik osoyishtaligi to‘liq ta’minlanganiga kim kafolat beradi?”, — deydi Senat raisi.
Davlat sanitariya-epidemiologiya nazorati respublika markazi ma’lumotlariga ko‘ra, 2017—2018-yillarda 1190 nafar fuqaro (ularning 222 nafari bolalar) ovqatdan zaharlangan va 9 nafari vafot etgan.
Mamlakatdagi dehqon bozorlarining sanitariya-epidemiologik holati ham talabga javob bermaydi.
Ma’lumotlarga ko‘ra, jami 300 ga yaqin dehqon bozori va ularning 150 dan ortiq shoxobchasining aksariyati ichimlik suvi bilan to‘liq ta’minlanmagan, savdo rastalari yetishmaydi, tez buziluvchi oziq-ovqat mahsulotlarini sotish uchun maxsus rastalar va sharoitlar yaratilmagan.
Veterinariya-sanitariya laboratoriyalari tashkil etilmagan, chiqindilarni yig‘ish uchun maxsus joylar ajratilmagan.
Shuningdek, dehqon bozorlarida sanitariya-gigiyena talablariga javob bermaydigan, bozor hududining ochiq maydonlarida yoki uy sharoitida tayyorlangan taomlar bilan savdo qilish amaliyoti tobora avj olmoqda.
2018-yilda o‘tkazilgan sanitariya nazorati tadbirlarida dehqon bozorlaridagi 46 855 nafar sotuvchi tibbiy ko‘rikdan o‘tmaganligi aniqlangan.
“Ana shunday bir sharoitda oziq-ovqat mahsulotlarini ishlab chiqarish, tashish, saqlash va realizatsiya qilish hamda xizmat ko‘rsatish paytida sanitariya qoidalari, normalari va gigiyena normativlariga o‘z vaqtida rioya etilishini ta’minlash bo‘yicha sanitariya-epidemiologiya xizmatining nazorat faoliyati cheklanganicha qolmoqda.
Ya’ni qonunchilikka muvofiq, sanitariya-epidemiologiya xizmati tekshiruv o‘tkazish uchun vakolatli organga buyurtma beradi.
Buyurtma vakolatli organ tomonidan uch ish kunidan kechiktirmasdan ko‘rib chiqiladi hamda tekshiruvni o‘tkazish kelishilganligi yoki rad etilganligi to‘g‘risida qaror qabul qilinadi.
Bunday amaliyot sanitariya-epidemiologiya xizmati zimmasiga yuklatilgan vazifalarni to‘liq ro‘yobga chiqarish, ayniqsa, inson hayoti va sog‘lig‘iga xavf tug‘dirishi mumkin bo‘lgan har qanday holatlarga nisbatan tezkor choralar ko‘rish imkoniyatini deyarli yo‘qqa chiqarmoqda.
Birgina misol: 2018-yilning sentabrida Qarshi shahridagi “Baxtli oila” to‘yxonasida o‘tkazilgan to‘yda 70 nafar fuqaro ovqatdan zaharlangan.
Shunga qaramasdan, sanitariya-epidemiologiya markaziga ushbu obyektdagi zaharlanish holatini tekshirish va profilaktik choralarni amalga oshirish maqsadida qisqa mud- datli sanitariya nazoratini o‘tkazishga ruxsat berilmagan.
Shu bois, Nazorat qiluvchi organlar tomonidan tadbirkorlik subyektlari faoliyati tekshiruvlarini kelishish va o‘tkazish tartibi haqidagi 2018-yil 7-sentabrda ro‘yxatdan o‘tkazilgan vaqtinchalik nizomga tegishli o‘zgartishlar kiritish dolzarb ahamiyatga ega.
Xususan, davlat sanitariya nazoratini barcha obyektlarda, shu jumladan, tadbirkorlik subyektlariga qarashli savdo va xizmat ko‘rsatish obyektlarida istalgan vaqtda, hech qanday moneliksiz, moliya xo‘jalik faoliyatiga aralashmagan holda o‘tkazish mumkinligini belgilash masalasini ko‘rib chiqishni maqsadga muvofiq deb hisoblaymiz.
Zero, insonning hayoti va sog‘lig‘i barcha narsadan, jumladan tadbirkorning moliyaviy manfaatlaridan ham ustundir”, — deydi Nig‘matilla Yo‘ldoshev.
Izoh (0)