“Forish” poligonida 22-aprel kuni “Hamdo‘stlik qalqoni—2019” hamkorlikdagi maxsus-taktik o‘quv mashg‘ulotlarining ochilish marosimi bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
Unda Pokiston va Turkiyaning O‘zbekistondagi harbiy attashelari, Mudofaa vazirligi markaziy apparati hamda Markaziy harbiy okrug qo‘shinlari qo‘mondonligi vakillari ishtirok etdi.
“Hamdo‘stlik qalqoni—2019” o‘tkazilayotgan hamkorlikdagi o‘quv mashqlarida harbiy xizmatchilar jahonda va mintaqada keskin o‘zgarib borayotgan harbiy-siyosiy vaziyat, milliy va global xavfsizlik sohasida ro‘y berishi mumkin bo‘lgan xatar hamda tahdidlarga qarshi kurashishning eng ma’qul usul va uslublarini qo‘llash borasida o‘zaro tajriba almashadi.
“Osiyoning eng ilg‘or armiyalardan biri hisoblanuvchi O‘zbekiston armiyasi bilan tajriba almashish, biz uchun muhim ahamiyatga ega. O‘ylaymanki, bir necha kun davom etadigan hamkorlikdagi maxsus-taktik o‘quvlar uchchala tomon uchun ham birdek manfaatli bo‘ladi”, — deydi Pokiston maxsus bo‘linmasi komandiri Salmon Tariq.
O‘zbekiston Mudofaa vazirligi, Pokiston va Turkiya qurolli kuchlari o‘rtasida harbiy hamkorlik rejasiga muvofiq o‘tkazilayotgan hamkorlikdagi ushbu mashg‘ulotlar 27-aprelga qadar davom etadi.
Ochilish marosimi yakunlangach, mehmonlar poligonda ekstremal sharoitlarda yashovchanlikni saqlash bo‘yicha yaratilgan ko‘rgazmali vositalar bilan tanishdi.
Izoh (0)